DILI, 16 de Outubro de 2026 (I-KLIK.INFO)-Liuhusi diskursu enseramentu ba feira komemorasaun loron nasional liberdade imprensa Primeiru Ministro Xanana Gusmão konsidera servisu ne’ebé jornalista sira halo la’ós fasil tanba ho limitasaun rekursu sira maibe jornalista sira kontinua esforsu hodi buka no fahe informasaun ba públiku tanba ne’e governu tenke respeita indepedénsia redasaun ne’ebé eziste iha média independente sira no instituisaun estatál ne’ebé tau ba média no jornalista sira hanesan Sekretáriu Estadu Komunikasaun Sosial (SEKOMS) no Konsellu Imprensa Timor Leste (KI-TL) atu hametin kooperasaun iha formasaun jornalista seguransa teknolojia no sustentabilidade média.
PM Xanana Gusmão dehan, papel jornalista nian laos fasil maskí iha rekursu ne’ebé limitadu maibe jornalista sira kontinua esforsu hodi buka no fahe informasaun ba públiku, nunee nia agradese ba jornalista sira ne’ebé kontinua dedika an no sacrifisiu hodi defende faktu respeita etika jornalista nain hodi tau interese públiku nuudar prioridade, nune’e mprensa ne’ebé forte ajuda harii estadu ne’ebé forte no jornalista ne’ebé profisional ajuda hametin demokrasia no unidade nasional.
“Ita presiza kria oportunidade ba jornalistas jovens sira, hasa’e kapasidade profisional no apoia média atu bele servisu ho dignidade no independênsia no governu tenke respeita independensia redasaun, no media tenke hala’o knaar ho integridade no responsabilidade” dehan PM Xanana iha ambitu enseramentu feira ba komemorasaun loron nasional liberdade imprensa iha CCD, (16/10).
Nia dehan tan, instituisoens públikas tenke fó asesu ba informasaun ofisial ho klaru no iha tempu adekuadu, maibé, kombate fake news la-ós atu taka ema nia ibun ka limita krítika ba Governu no liberdade de imprensa no direitu atu hato’o opiniaun tenke respeita nune’e objetivu ita-nian mak ajuda povu atu distingue informasaun loos hosi informasaun falsa.
“Hau enkoraja SECOMS, Konselho de Imprensa, na’in-ba-media no parseirus de dezenvolvimentu sira atu hametin kooperasaun iha formasaun jornalista, seguransa, teknolojia no sustentabilidade media” dehan Xanana Gusmão.
Jornalista: Silvino Freitas
