Dili, 13 de Outubro de 2026 (IKLIK.INFO)-Komunidade sira hahú iha antusiazmu atu halo teste ba raan atu identifika sira nia isin ba moras HIV maibé ekipamentu saúde teste raan nian ka reazente teste raan dadaun ne’e menus, nune’e Institutu Nasionál Combate SIDA (INCSIDA) kontinua enkoraja komunidade sira ne’ebé simu ona informasaun husi INCSIDA atu hakbesik an nafatin na sentru no postu saúde atu bele hetan tratamentu.
Prezidente INCSIDA Daniel Marçal dehan, dadaun ne’e INCSIDA difikulta hela ho reazente ba teste raan nian, tanba teste nee importante tebes atu bele identifika ema ne’ebé iha infeksaun husi moras HIV hodi bele halo tratamentu ba ema nune’e bele salva ema labele mate tanba HIV.
“Antusiazmu komunidade nian ba teste raan nee boot tebes agora ita iha dezafiu ida maka ne’e rezente ka ekipamentu teste raan ne’e menus no laiha” dehan Prezidente INCSIDA Daniel Marcal iha Praia dos Coqueiros Dili, (13/10).
Nia dehan tan, maibé sira kontinua enkoraja partisipante sira atu bele kontinua hakbesik an ba sentru saúde no postu saúde hodi halo teste ba raan, nune’e ema la hatene sira nia estatus ba moras refere nune’e sei nafatin iha tranzmisaun hodi halo ema barak sei lakon vida, tanba ema ne’ebé tama ona ba ida SIDA saúde la di’ak ona tanba tratamentu ne’e fasil liu ba ema ho moras HIV no ema ne’ebé tama ona moras SIDA nee tratamentu ne’e komplikadu tanba ema tenke hemu ai-moruk barak no dalaruma ai-moruk sira ne’e mos ninia impaktu negativu ba fali ema nia saúde.
“Éspera iha tempu badak mai nee iha ona reazente para atividade sira hanesan loron hira iha ne’e bele teste raan se lae problema boot ba ita hotu” dehan Daniel Marçal.
Nune’e dadus husi ema infeksaun husi moras HIV ne’e sei uza dadus anterior hamutuk 2600 resin, munisípiu ne’ebé rejista numeiru boot liu maka Dili, Bobonaro, Oecusse no Suai nee mak kazu sae makaas.
Jornalista: Silvino Freitas
