DILI, 8 Outubru 2026 (I-Klik.info)- Kandidatu sira ne’ebé dadaun ne’e iha Sistema Work Ready Pool (WRP) hamutuk 90 mill maibé kompaña sira iha Australia dadaun ne’e seida’uk barak atu emprega kandidatu sira maka dadaun ne’e prontu ona iha sistema, nune’e Sekretáriu Estadu Formasaun Profesional no Empregu (SEFOPE) dadaun ne’e seida’uk iha planu atu halo tan loke tan vaga foun ba Seasonal Worker Program (SWP).
Diretór Jerál SEFOPE Carlito do Rosario dehan, joven timoroan ne’ebé dadaun ne’e naran iha ona sistema Work Ready Pool ho kompleta numeiru referénsia dadaun nee hein de’it kompaña atu hili sira hodi bele halo teste sira maka lian, fiziku no saúde ne’ebé hanaran skill test, maskí kandidatu traballador sira ne’e hetan ona numeiru referénsia maibé funsionáriu sira iha DNEE revista hikas sira nia kapasidade lian nian maka seida’uk di’ak SEFOPE sei fasilita formasaun liuhusi DIFAT durante hein iha fulan 3 too 6 maibe durante formasaun mak kompaña bolu ona sira bele ba ona tuir entrevista hodi hili sira, nune’e SEFOPE sei la indika ema ruma atu kompaña hili maibe kompaña rasik mai ho nia kriteria atu bele halo selesaun ba kandidatu sira tanba area ne’ebé traballador sira atu ba halo servisu ne’e diferente.
“Iha maluk balun ko’alia iha liur dehan ami iha familiarizmu partidarizmu, prontu maluk sira ne’e tempu ruma ita bele ba check hamutuk iha city 8 iha sistema nia prosesu halo ne’ebá, karik informasaun ida rua maka falla nee normal” dehan DJ SEFOPE Carlito do Rosario iha AIPNL, (8/10).
Nia dehan tan, SEFOPE sei la halo tan rekrutamentu ba kandidatu traballador foun tanba dadaun ne’e kandidatu ne’ebé prontu ona iha sistema hamutuk 90 mill, nune’e karik halo rekrutamentu foun tenke metade husi numeiru traballu hetan hotu ona oportunidade hodi ba servisu iha Australia, nunee mos karik iha ona empregador barak entaun bele loke rekrutamentu foun, maibe ho numeiru kandidatu sira nune’e SEFOPE seida’uk bele loke vaga foun SWP nian tanba dadaun ne’e empregador foun mak seida’uk barak maskí ema barak iha interese nafatin hakarak atu ba servisu iha Australia.
“Agora ne’e ida returning worker sira maka fulan sira mai fali patraun bolu fali, maibe foun ne’e depende ba empregador foun ka empregador aumenta ninia ema nee tuir ninia kriteria ita bolu entrevista” dehan DJ Carlito do Rosario.
Jornalista: Silvino Freitas
