DÍLI, 09 de October de 2026( I-Klik info) – Konsellu Impresa Timor-Leste (CITL) hamutuk ho Fundasaun ABC ID organiza formasaun loron lima ba jornalista na’in 14 Oinsa Sai Jornalista Inkluzivu ba Ema Hotu
Diretor Ezekutivu, Antonio Dias hateten formasaun ne’e importante atu dezenvolve kapasidade, ética no profisionalizmu jornalista Timor-Oan. Nia mós hato’o orgullu tanba formador sira hotu Timor-Oan.
“Ha’u husu ba partisipante sira atu aproveita oportunidade ne’e, partilha esperiénsia no aprende husi formador sira, atu bele hala’o knaar ho responsabilidade iha sira nia munisípiu no komunidade sai jornalista la’ós de’it kona-ba ko’alia ho autoridade sira, maibé tenke iha kapasidade no responsabilidade atu fó informasaun loos ba públiku”, nia dehan iha salau. CITL, kinta boot, (09/10).
Nia dehan, Formasaun ne’e foka ba teoria no prátika jornalismu, preparasaun profisionál no kontribuisaun ba dezenvolvimentu demokrasia iha Timor-Leste nia esperansa katak formasaun ne’e bele hahoris jornalista brani, profisionál no komprometidu ba Timor-Leste.
Iha parte hanesan, Aida Amaral da Costa, jornalista husi Rádio Comunidade Comoro, hatete formasaun ne’ebé hala’o liuhusi kooperasaun entre Konsellu Imprensa no ABC ID durante semana ida, fó benefísiu boot ba jornalista sira, liuliu atu hasa’e koñesimentu no kapasidade iha área jornalizmu.
“Durante formasaun ne’e, jornalista sira aprende kona-ba prosesu preparasaun notísia, hahú husi halo peskiza kona-ba asuntu ne’ebé atu kobre, prepara pergunta sira antes ba halo kobertura iha terenu, to’o ba prosesu hakerek notísia ho di’ak no klaru iha formasaun ne’e, sira aprende mós kona-ba importánsia akurásia no ezatidaun iha notísia, identifika valór notísia, foti nota durante kobertura iha terenu, no téknika foti fotografia ho di’ak, inklui ângulu fotografia nian”.
Nia mos dehan, formasaun ne’e fó koñesimentu ba jornalista sira kona-ba téknika grava vídeo ne’ebé apropriadu ba notísia televizaun, atu asegura katak imajen sira ne’ebé aprezenta bele ajuda públiku komprende informasaun ne’ebé fó sai.
“Jornalista sira aprende mós kona-ba jornalizmu inkluzivu, ne’ebé la haree de’it ba ema ho defisiénsia, maibé konsidera ema hotu-hotu, la ho diskriminasaun. Jornalizmu inkluzivu importante atu asegura katak ema hotu bele hetan reprezentasaun justu iha notísia formasaun ne’e fó benefísiu boot ba jornalista sira tanba ajuda sira komprende di’ak liu oinsá atu hakerek no aprezenta notísia ne’ebé di’ak, klaru no fasil atu komprende ba audiénsia, tantu ba sira ne’ebé lee, haree no rona”, dehan Aida
Nia espera katak koñesimentu ne’ebé hetan durante formasaun semana ida bele aplika iha servisu loroloron, atu hasa’e kualidade notísia no hametin responsabilidade jornalista sira nian iha sosiedade.
Jornalista: Joanina Casimiro
