Bangkok, 8 Agostu 2026 (Iklik News.info) – I-klik News Investigative, iha kolaborasaun ho Tempo Indonesia, Bangkok Post, Malaysia, Rappler Filipinas no Cambodia Center for Independent Media, produz istória investigativa kona-ba ekonomia restaurativa iha Sudeste Aziátiku.
Programa kolaborasaun ne’e analiza kresimentu ekonomiku iha rejiaun Sudeste Aziátiku, ne’ebé barak liu dudu husi estrasaun rekursu naturál, espansaun industriál no integrasaun iha kadeia forneseimentu globál.
Bazeia ba análize hosi Tempo Indonesia, modelu dezenvolvimentu ne’e kria oportunidade ekonomika, maibé mos kontribui ba degradasaun ambientál, aumenta vulnerabilidade ba mudansa klimátika, hamosu dezigualdade no aumenta presaun ba povu indígena no komunidade lokál sira.
Tanba ne’e, programa bolsa estudu ne’e apoia jornalista sira hodi produz istória independente kona-ba ligasaun entre mudansa klimátika no nesesidade atu reinventa sistema ekonomiku.
Wahyu Dhyatmika, CEO Tempo Digital no ativista ba direitu umanu, hateten katak programa ne’e dezenvolve hodi promove jurnalizmu rigorozu no independente. Nia dehan bolsa estudu ne’e fó oportunidade ba jornalista sira no redasaun media atu hala’o serbisu ho independénsia.
“Bolsu estudu ne’e hakarak muda narativa klimátika globál, hosi haree krize de’it ba haree oportunidade atu halo restaurasaun ne’ebé inovativu no sistemátika,” dehan Wahyu.
Iha Festival Climate Bangkok, Wahyu Dhyatmika hateten katak mundu presiza mudansa fundamentál iha ekonomia, inklui iha maneira kria dezenvolvimentu, hasai ema hosi kiak no proteje ambiente.
“Ha’u hatene katak imi hotu sei hasoru dezafiu, serbisu no harii karreira iha área ida-ne’e. Maibé, ba ema barak iha liur hosi komunidade ambientál, ida-ne’e sei sai kapítulu foun no seidauk koñesidu didi’ak. Tanba ne’e, presiza mudansa boot iha maneira hanoin no aten-barani atu hanoin liuhosi dalan konvensionál, imajina mundu foun no buka maneira foun atu halo buat sira,” dehan Wahyu.
Tempo Indonesia hein katak media hosi nasaun neen sei kontinua kolabora no inspira públiku liuhosi istória sira ne’ebé bele muda narativa ne’ebé eziste ona no kontribui ba mudansa ne’ebé di’ak liu.
Topiku prinsipál sira ne’ebé sei hetan atensaun mak restaurasaun floresta, restaurasaun tasi no ekosistema ai-parapa, biodiversidade no agrikultura rejenerativa.
