Bobonaro, 3 Outubru 2026 (Iklik.Info) — Diretór Eskola EBC Victor Santa iha aldeia Asulaka Suku Lahomea, postu administrativu Maliana Munisípiu Bobonaro, rekoñese Kompañia MOKATIL, iha implementasaun merenda eskolár iha loron dahuluk iha 14 Setembru 2026, oferese modo ho naan ne’ebé kondisaun la diak ka dodok ba estudante sira iha eskola ne’e, bainhira eskola haree problema ne’e, direksaun kontaktu kedas Kompañia MOKATIL, no kompañia substitui naan ne’e ho mantolu.
Diretór Eskola EBC Victor Santa, Guilhermino Moniz mós konfirma katak iha loron primeiru implementasaun, 14 Setembru 2026, hahán ne’ebé kompañia MOKATIL fornese ba EBC Victor Santa iha problema ho kualidade naan ho modo duni. Loos duni, naan no modo sira ne’ebé kompañia MOKATIL oferese mai Eskola EBC Victor Santa ne’e, modo ho naan dodok hotu.
Nia hateten, parte eskola la iha informasaun antes kona-ba kondisaun hahán ne’ebé sei entrega. Bainhira sira mai eskola iha dader, mak foin sira haree no hatene katak iha problema ho naan ne’ebé fornese husi kompañia MOKATIL ne’e laiha kualidade.
“Loos duni modo ho naan kompañia MOKATIL lori mai ne’e dodok hotu. Maibé ami la hatene buat ida, derepente dader ami mai maka ami mos hatene, tan kompañia MOKATIL sira hatun sasan ne’e kalan tuku 9, loron Domingo, tan ita presiza deskansa,” dehan Diretór Eskola EBC Victor Santa, Guilhermino Moniz, ba jornalista sira iha edifisiu EBC Victor Santa iha Aldeia Asulaka Suku Lahomea Maliana, Kinta 1/10.
Relasiona ho kestaun naan dodok ne’e, Diretór EBC Victor Santa konfirma katak informasaun ne’ebé ema kestiona kona-ba problema ne’e loos duni akontese iha eskola. Maibé bainhira eskola identifika problema ho naan, direksaun kontaktu kedas kompañia MOKATIL atu fó sai solusaun.
“Informasaun ne’ebé ita boot sira kestiona naan dodok ne’e loos duni. Maibé loron ne’e kedas kompañia MOKATIL ami kontaktu kedas, ba MOKATIL sira mos substitui kedas naan ne’e ho mantolu,” nia dehan.
Nia hatutan katak problema ne’e akontese iha EBC Victor Santa, maibé nia la iha informasaun kona-ba se problema hanesan mos akontese iha eskola seluk ka lae.
Kazu ne’e hatudu katak kontrolu no monitorizasaun kona-ba kualidade merenda eskolár importante atu asegura katak hahán ne’ebé fornese ba estudante sira seguru no tuir padraun qualidade ne’ebé determina ona.
Enterantu iha menu ne’ebé iha maka iha loron Segunda-feira estudante sira tenke kosumu maka, etu mutin, naan karau, modo, fehuk ropa, mina bemoli, masin dapur, no lis mean ho mutin. Iha loron Tersa-feira estudante sira konsumu maka etu mutin, tempe, modo, tomate, mina bimoli, aifuan fresku, no lis mean ho mutin.
Iha loron Kuarta-feira estudante sira tenke kosumu maka etu mutin, manu tolun, modo tan raba-raba, lis mean ho mutin, tomate, masin dapur no mina bemoli. Iha loron Kinta-feira estudante sira konsumu maka etu mutin, tahu, modo/ bringela, tomate, mina bimoli, lis mean ho mutin, aifuan fresku no masin dapur. No iha loron ikus Sesta-feira estudante sira tenke kosumu maka etu mutin, modo koto/naan, senhora, fehuk ropa, masin dapur, mina bimoli, no lis mean ho mutin
Nune’e mós iha eskola EBC Victor Santa iha aldeia Asulaka Suku Lahomea postu Administrativu Maliana Munisípiu Bobonaro, iha estudante hamutuk 697 no mane iha 317 ho feto iha 362.
PAMB Bobonaro Suspende Fornesimentu Merenda MOKATIL tanba Kualidade Ai-han La Di’ak
Prezidente Autoridade Munisípiu Bobonaro (PAMB), Paulo Moniz Maia, hateten katak Autoridade Munisípiu Bobonaro deside la kontinua kontratu ho Kompañia MOKATIL ba fornese merenda eskolár, tanba kualidade ai-han ne’ebé fornese ba estudante sira konsidera la tuir padraun ne’ebé presiza.
Paulo Moniz Maia esplika katak, iha inísiu implementasaun programa merenda eskolár, grupu ida ho naran Ekipa Jestaun Programa (EJP) mak responsavel atu ezekuta programa ne’e. Osan ne’ebé simu husi programa ne’e uza atu sosa ai-han, hanesan modo tahan, naan, foos no nesesidade sira seluk, no menu merenda eskolár mos prepara husi grupu EJP rasik.
Maibé, tuir programa Primeiru Ministru Kay Rala Xanana Gusmão kona-ba utilizasaun batar lokal ba programa merenda eskolár iha Timor-Leste tomak, Autoridade Munisípiu Bobonaro deside bolu Kompañia MOKATIL atu fornese merenda eskolár ba estudante sira iha Munisípiu Bobonaro, liuliu iha Postu Administrativu Maliana.
Prezidente PAMB hateten, durante MOKATIL ezekuta fornese merenda eskolár, iha reklamasaun husi inan-aman no profesór sira kona-ba kualidade ai-han. Iha kazu balun, modo tahan no naan ne’ebé oferese ba estudante sira la di’ak.
“Bainhira nia ezekuta merenda eskolár, nia oferese modo tahan ho naan aat. Entaun ha’u kritika ida, protestu husi inan-aman no profesór sira la simu, kompañia ida labele fornese ai-han,” hateten Paulo Moniz Maia.
Nia mós hateten, la’os de’it naan no modo tahan mak iha problema, maibé mantolu no mina mos iha reklamasaun kona-ba kualidade. Tanba ne’e, nia fó ona atensaun ba kompañia atu haree didi’ak kualidade produtu sira antes fó ba estudante sira.
Paulo Moniz Maia esplika katak kontratu ho MOKATIL fó ba períodu fulan rua de’it iha fulan Agostu ho Setembru tinan ne’e, iha fulan Setembru 2026, kontratu ne’e la kontinua tan, no grupu EJP sira mak kontinua fali implementa programa merenda eskolár.
Nia subliña katak desizaun ne’e la’os hapara permanentemente oportunidade ba MOKATIL atu fornese merenda eskolár iha futuru. Maibé kompañia ne’e atu hadi’a nia kapasidade no prepara fundus no rekursu sira antes atu bele kontinua fali.
“MOKATIL, ha’u dehan la’os hapara permanente, maibé hadi’a o nia an lai. Prepara o nia fundus lai. Keta o nia fundus seidauk sufisiente, karik prepara didi’ak. Tinan foun ha’u bele bolu fali kontinua. Se ita boot la hadi’a an, maka ita boot sei la kaer projetu ida merenda fó ba eskola sira iha Bobonaro,” hateten Paulo Moniz Maia.
Jornalista: David da Costa
