Dili, 25 de Setembro de 2026 (I-Klik.info): Diretór Kompaña Petrotim Resource S.A Tim Lay dehan, akordu ne’ebé halo ho Petrotim Resource ne’e atu halo peskiza ba rekursu natural sira hanesan mina no gas nunee sei esplora tuir regulamentu ANP nian, maski iha produsaun fahe kontratu Petrotim mak maioria interese partisipante maka TimorGAP iha interese partisipasaun ho pursentu 30 no Petrotim interese partisipasaun ho pursentu 70 maibé parte kompaña sei iha konsiderasaun ne’ebé klean ba Timor GAP nia partisipasaun ne’ebé kiik tanba partisipasaun TimorGAP ne’e importante iha prosesu dezenvolvimento seitor petroleum no Gas.
“Kompaña ne’ebé atu investe tenke iha intensaun ne’ebé moos ba mineiru sira, tanba asuntu mina no gas ne’e la’ós fasil tanba tenke presiza tekniku, osan no tempu” dehan Diretór Kompaña Petrotim Resource S.A Tim Lay iha Timor Plaza, (25/9).
Nia dehan tan, responsabilidade tomak ba asuntu tekniku no finansa sei mai husi kompaña rasik maibé presiza akompaña husi TimorGAP no prosesu tomak sei tuir rekezitu sira husi ANP nia aprovasaun, nune’e kustu orsamentu ba iha peskiza refere aprova mai husi investor rasik iha kada tinan ho montante dolar Amerikanu millaun rua too tolu maibé iha industria mina no gas kustu orsamentu ne’e uituan loos no uza de’it ba inisiu peskiza nian.
“Risku sempre kompaña agora ami nia akordu ne’e entre karik lakon investor mak lakon, TimorGAP laiha responsabilidade ba orsamentu sira tanba ami tenke mai akompaña ita nia dezenvolvimento ba mineirus ba mina no gas” dehan Tim Lay.
Nia dehan tan, peskiza PSC TL-OT-25-24 sei kobre area sira neebe lokakiza prinsipalmente iha munisípiu Bobonaro no Ainaro ho area adisional sira ne’ebé estende ba munisípiu Ermera liuliu iha Atsabe nomos ba parte balun husi munisípiu Covalima nian, nunee peskiza nee nia impaktu ne’e mininal tanba kompaña sei ba foti raihenek fatuk too iha etapa sismiku ne’ebé nia impaktu mos sei la dun barak no peskiza ne’e lao durante tinan ida too rua inklui mos analiza.
Prezidente TimorGAP Rui Soarea dehan, akordu Join Operating Agreement (JOA) atu parte rua entre TimorGAP ho Petrotim Resource hodi bele implementa servisu hamutuk, nune’e Petrotim Resource mos asina ona Production Sharing Contract (PSA) ho governu ba implementasaun projeitu peskiza mina no gas ne’ebé halo iha munisípiu haat.
Jornalista: Silvino Freitas
