Díli, 17 Setembru 2026 (Iklik.Info) – Taxa pobreza iha Timor-Leste tun hosi 41,8% iha 2014 ba37% iha 2024, maibé pobreza sei sai dezafiu boot liu iha área rurál, ne’ebé atinje 45,5% hosi populasaun, kompara ho 18,4% iha área urbana. Dadus ne’e hatudu iha Relatóriu Sumáriu kona-ba Pobreza, bazeia ba rezultadu Peskiza kona-ba Kondisaun Moris iha Timor-Leste, bazea ba Timor-Leste Survey of Living Standards (TLSLS) 2024.
Primeiru Ministru (PM), Kay Rala Xanana Gusmão hateten, Vise Ministra Finansas, Regina de Jesus, mós aprezenta relatóriu kona-ba pobreza iha Timor-Leste, ne’ebé prepara husi Ministériu Finansas rasik. Relatóriu ne’e iha diferensa uitoan ho relatóriu ne’ebé Banku Mundiál aprezenta.
Xanana Gusmão hateten, tanba iha diferensa entre relatóriu rua ne’e, iha reuniaun Konsellu Ministrus, Governu husu Ministériu Finansas atu aprezenta no esplika didi’ak relatóriu kona-ba pobreza, inklui halo komparasaun ho dadus ne’ebé Banku Mundiál aprezenta.
“Iha Konsellu Ministru ami husu ba finansas atu aprezenta didi’ak relatóriu ne’e, halo komparasaun ho saida maka Banku Mundiál tau ne’e. Nune’e Governu bele prepara aan, bainhira to’o iha Parlamentu diskusaun Orsamentu Jerál Estadu ne’e sira sei hakilar ami, rona tuir ba Banku Mundiál ninia relatóriu,” dehan PM Xanana Gusmão ba jornalista sira iha Palásiu Prezidensiál Bairu-Pite, Kinta 17/09.
Primeiru-Ministru mós hateten, relatóriu Banku Mundiál ne’ebé refere ba situasaun pobreza iha Timor-Leste uza dadus tinan 2014. Informasaun kona-ba relatóriu ne’e mós nia hateten ona ba Prezidente Repúblika José Ramos-Horta.
Entertantu iha Konsellu Ministrus horseik apoia publikasaun Relatóriu Sumáriu kona-ba Pobreza iha Timor-Leste, ne’ebé aprezenta husi Vise Ministra Finansas, Regina de Jesus. Relatóriu ne’e, elabora bazeia ba rezultadu sira hosi Peskiza kona-ba Kondisaun Moris iha Timor-Leste (TLSLS) 2024, aprezenta dadus atualizadu kona-ba insidénsia no karakterístika pobreza iha Timor-Leste.
“Rezultadu sira hatudu katak taxa pobreza nasionál tun hosi 41,8% iha 2014 ba 37% iha 2024, redusaun ida hosi pontu persentajen 4,8 iha dékada ikus ne’e. Pobreza kontinua iha insidénsia aas liu iha área rurál sira, ne’ebé afeta 45,5% hosi populasaun, kompara ho 18,4% iha zona urbana sira, ho diferensa sira mós entre munisípiu sira,” Hateten iha komunikadu ofisiál ne’ebe Iklik.Info sita.
Hafoin publikasaun relatóriu sumáriu, INETL, IP no Ministériu Finansas, ho apoiu husi Banku Mundiál, sei dezenvolve Avaliasaun Pobreza no Ekuidade, bazeia ba dadus TLSLS 2024, ho objetivu atu aprofunda análize ba fatór sira ne’ebé kontribui ba redusaun pobreza no mós apoia formulasaun polítika públika bazeia ba evidénsia ne’ebé orienta ba kreximentu ekonómiku ne’ebé inkluzivu no rezistente liután.
Jornalista: David da Costa
