Iha mundu globalizadu atual ne’ebé muda ho lalais, susesu organizasaun ida la depende deit ba rekursu finanseiru, teknolojia ka infraestrutura. Faktu importante liu mak kapasidade ema sira ne’ebé lidera, aprende, adapta ba mudansa no servisu hamutuk atu atinje objetivu komún. Tanba ne’e, investimentu ba ema sai hanesan estratéjia importante ida atu garante sustentabilidade no dezenvolvimentu organizasaun iha tempu naruk.
Investimentu ba ema la signifika deit fó treinamentu ka formasaun occasional. Investimentu ida-ne’e inklui esforsu atu dezenvolve kapasidade, koñesimentu, abilidade no lideransa funsionáriu sira nian hodi sira bele fó kontribuisaun máxima ba organizasaun no komunidade. Bainhira organizasaun investe iha ema, organizasaun la’os deit atu atinje rezultadu imediatu, maibé mos prepara futuru ida ne’ebé forte no sustentável.
Oportunidade aprendizajen hanesan formasaun profisionál, coaching, mentoria, no programa dezenvolvimentu lideransa bele ajuda funsionáriu sira aumenta sira-nia kompeténsia no konfiansa-an. Ema ne’ebé sente katak sira valorizadu no apoiadu atu aprende normalmente sei iha motivasaun no kompromisu ne’ebé aas liu atu halo servisu ho kualidade diak. Kontribuisaun sira nian la reflete deit iha produtividade organizasaun, maibé mos iha qualidade servisu ne’ebé komunidade simu.
Benefísiu investimentu ba ema la limita deit ba indivíduu ida-idak. Organizasaun ne’ebé iha ekipa kompetente no preparadu bele aumenta efisiénsia, melhora tomak prosesu servisu no responde diak liu ba nesesidade benefisiáriu ka komunidade. Bainhira rekursu umanu dezenvolvidu ho diak, impaktu ne’ebé produzidu mos sei boot liu no bele kontribui ba mudansa sosial ne’ebé sustentável.
Maske nune’e, importante atu komprende katak dezenvolvimentu ema la’ós depende deit ba edukasaun formal ka treinamentu ofisiál sira. Aprendizajen mos bele mai husi esperiénsia lor-loron, observasaun, troka koñesimentu ho kolega sira, servisu iha projetu sira, rede profisionál no utilizasaun plataforma digital sira ne’ebé fasilita asesu ba informasaun. Iha tempu ne’ebé teknolojia sai hanesan parte importante hosi moris, oportunidade atu aprende agora luan liu duké uluk.
Organizasaun iha papel importante atu kria ambiente ne’ebé enkoraja aprendizajen no kresimentu profisionál. Maibé, responsabilidade ba dezenvolvimentu pessoal tenke hahu husi ema rasik. Ema ida-idak presiza iha vontade atu aprende no kontinuamente melhora nia-an. Atu halo ne’e, importante atu identifika forsa no fraqueza sira, hatene área ne’ebé presiza dezenvolve no buka oportunidade atu aprende ho inisiativa rasik.
Infelismente, iha organizasaun balu, oportunidade aprendizajen ne’ebé disponivel dala barak la aproveita ho máxima. Maske treinamentu, mentoria ka oportunidade formasaun iha rai-liur disponivel, la’ós ema hotu-hotu mak iha motivasaun atu implementa koñesimentu ne’ebé nia aprende. Situasaun ida-ne’e sai hanesan desafiu boot ida ba esforsu dezenvolvimentu rekursu umanu.
Dezafiu seluk mak limitasaun fundu. La’ós organizasaun hotu-hotu mak iha kapasidade finanseira atu investe regularmente iha programa dezenvolvimentu profisionál. Kondisaun ida-ne’e bele limita oportunidade atu hasa’e kapasidade funsionáriu sira. Aleinde ne’e, fator sira hanesan falta tempu, prioridade familiar, asesu limitadu ba rekursu aprendizajen ka hanoin katak dezenvolvimentu pessoal mak responsabilidade organizasaun deit, mós bele sai obstákulu ba prosesu aprendizajen.
Atu supera dezafiu sira ne’e, importante atu hamosu kultura aprendizajen kontínua iha organizasaun. Kultura ida-ne’e tenke enkoraja ema hotu-hotu atu aprende durante sira-nia karreira tomak, partilla koñesimentu ho malu no responsabiliza ba sira-nia kresimentu rasik. Bainhira organizasaun no funsionáriu sira servisu hamutuk ho objetivu hanesan, investimentu ba ema sei fó rezultadu ne’ebé boot liu ba produtividade, inovasaun no kualidade servisu.
Oportunidade atu aprende deit la sufisiente. Susesu depende mos ba atitude no kompromisu atu aprende, adapta no dezenvolve-an kontinuamente. Koñesimentu no abilidade ne’ebé aumenta sei ajuda ema sira atu fó servisu ho kualidade aas no responde efetivamente ba nesesidade komunidade.
Ikus mai, se ita hakarak muda ita-nia futuru, mudansa ne’e tenke hahu husi ita rasik. Organizasaun bele fó apoiu, fasilidade no oportunidade, maibé responsabilidade boot liu ba kresimentu pessoal hela nafatin iha liman ema ida-idak. Bainhira ita investe iha ita-nia koñesimentu, abilidade no dezenvolvimentu an, ita la prepara deit ba susesu pessoal, maibé mos kontribui ba susesu organizasaun no bem-estar komunidade tomak.
Tempu mak rekursu valiozu liu ne’ebé ita iha. Tanba ne’e, uza nia ho matenek atu aprende, dezenvolve-an no aumenta kapasidade. Investimentu diak liu mak investimentu iha ema, tanba investimentu ida-ne’e sei produz rezultadu ne’ebé dura kleur no fó benefísiu ba jerasaun sira agora no iha futuru.
Hakerek nain: Benigna Vicente Martins, Oxfam iha Timor-Leste
