Dili, 31 de Agostu 2026 (I-Klik.info)-Komando Polísia Nasionál TimorLeste (PNTL) Munisipiu Dili hamutuk ho Unidade Espesial Polísia (UEP) apoiu husi ekipa komandu jeral hahu ona prepara parada konjuntu munisipiu Dili ba operasaun teknika taktika nian iha terenu hodi halo seguransa ba translasaun restu mortais prelados nain 3 ne’ebe translada husi Portugal mai Timor-Leste ne’ebe too iha aban, nune’e polísia sei hahu halo seguransa iha ohin kalan too serimonia funeral ba prelados nain 3 inklui amo bispu Dom Ricardo.
“Tanba ne’e ohin ita briefing ba planu operasaun taktika nian ba membru sira tomak ho komadante tekniku iha terenu hotu atu sira kumpri no responsabilidade ba orden iha planu seguransa hodi asegura seguransa durante ba vizita restu mortais too iha serimonia funbre nian” dehan Komadante PNTL munisipiu Dili Komisáriu Asistente Polísia Orlando Gomes iha eskrudra komandu Munisipiu Kaikoli, (31/08).
Nia informa tan, komandu sei asegura operasaun ba rute husi aeroportu ba tasi-tolu no rute ne’ebe programadu husi igreja, nune’e polísia sei asegura hodi taka rute sira ne’ebe sei lori prelados hafoin prelados liu sei loke fali ho movimentu hanesan bain bain, enkuantu movimentu tum tum nian sei la lao ona iha area tasi tolu nian maibe komandu sei autoriza no muda sira hodi movimenta too de’it iha area pontu entrada Jaoo Paulo nia kotuk.
“Orientasaun fo ona ba tranzitu atu halo ida ne’e no ohin ita hakarak tasi-tolu mamuk, hodi halo preparasaun ba simu restu mortais prelados nain tolu” informa Komisáriu Asistente Polísia Orlando Gomes.
Nia konklui, efetivu komandu hasai ona orden alerta II nunee koloka ona efetivu 200 resin inklui UEP ho UPM homos Kuartel Jerál nune’e efetivu ne’ebe sei halo seguransa ba serimonia hamutuk 1000 hodi asegura seguransa, nune’e mos seguransa sei laos husi parte polísia de’it maibé inklui mos F-FDTL iha momentu refere.
