Díli, 31 Agostu 2026 (Iklik.Info) — Emiradus Árabes Unidus (EAU) apoia projetu rezidénsia estudantil ba estudante universitáriu feto to’o na’in 300 iha Díli, enkuantu Prezidente Repúblika José Ramos-Horta ohin simu Ministra Estadu iha Ministériu Negósiu Estranjeiru EAU, Noura Al Kaabi, iha enkontru ofisiál iha Palásiu Prezidensiál Nicolau Lobato Díli.
Vizita ne’e sai hanesan vizita nivel aas dahuluk husi Emiradus Árabes Unidus mai Timor-Leste, no subliña relasaun amizade no parseria ne’ebé kontinua dezenvolve entre Timor-Leste no EAU.
Enkontru ne’e mosu hafoin asinatura Memorandu Entendimentu iha Maiu 2026 kona-ba Projetu Rezidénsia no Fasilidade Sosiál ba Estudante Feto sira. Projetu ne’e hetan apoiu husi EAU atu harii kompleksu rezidensiál modernu ida iha Díli, ne’ebé sei fornese akomodasaun ba estudante universitáriu feto to’o na’in 300.
Kompleksu ne’e dezeña ho objetivu atu fornese fatin hela ne’ebé seguru no dignu ba estudante feto sira, ho uza enerjia solar 100%, sistema armazenamentu udan-been no resiklajen bee-fo’er.
Iha enkontru ne’e, Prezidente Ramos-Horta hato’o nia agradesimentu ba apoiu EAU, liuliu iha área edukasaun feto, no reafirma kompromisu Timor-Leste atu hametin liután relasaun bilaterál entre nasaun rua.
Prezidente Ramos-Horta hateten, iha Vizita ohin husi Ministra Al Kaabi nu’udar testemuña ida ba amizade ne’ebé di’ak no buras entre Timor-Leste no Emiradus Árabes Unidus. Tanba ne’e hato’o agradese ba belun, Prezidente Sheikh Mohamed bin Zayed Al Nahyan, ba apoiu EAU nian ba edukasaun feto Timor-oan sira nian.
“Projetu ba Rezidénsia Estudantil Feminina la’ós de’it atu harii edifísiu ida, maibé ne’e mak realizasaun husi promesa katak kada joven feto sira, la haree ba nia background sosiál, sei iha asesu ba edukasaun, dignidade, no oportunidade atu harii nia futuru,” dehan Prezidente José Ramos-Horta iha komunikadu ofisiál ne’ebe Iklik.Info asesu husi Palásiu Prezidensiál Bairu-Pite, Segunda 31/08.
Nia mós hato’o agradesimentu ba Prezidente EAU, Sheikh Mohamed bin Zayed Al Nahyan, ba apoiu ba edukasaun feto Timor-oan sira no simu ho laran-haksolok planu EAU atu estabelese embaixada iha Díli.
Enkuantu ne’e, Ministra Noura Al Kaabi hato’o saudasaun husi Prezidente no Vise-Prezidente EAU ba Prezidente Repúblika José Ramos-Horta, Estadu no povu Timor-Leste.
Al Kaabi konsidera Timor-Leste hanesan belun loloos ba EAU no destaka solidariedade Prezidente Ramos-Horta ba povu EAU hafoin atake ne’ebé foin lalais ne’e hasoru nasaun ne’e.
Ministra Noura Al Kaabi hateten enkontru ne’e loke dalan foun ba kooperasaun iha setor oi-oin, inklui enerjia renovável, parseria ekonómika, kapasitasaun no apoiu tékniku ba Timor-Leste nia prezidénsia ASEAN iha 2029.
“Timor-Leste la’os de’it parseiru ida, maibé hanesan família, no ami iha kompromisu atu avansa relasaun ida-ne’e ho sinseridade no laran-di’ak ne’ebé Timor-Leste hatudu ona mai ami,” hateten Al Kaabi.
Delegasaun EAU mós informa Prezidente Ramos-Horta kona-ba Simeira ONU kona-ba Bee, ne’ebé sei realiza iha EAU ho ko-esponsor husi Senegal. Delegasaun ne’e husu mós Prezidente nia vizaun kona-ba asuntu globál ne’e, konsidera ninia lideransa no envolvimentu iha dezafiu dezenvolvimentu sustentável.
Hafoin enkontru, Prezidente Ramos-Horta no Ministra Al Kaabi vizita fatin konstrusaun Kompleksu Rezidénsia Estudante Feto, hodi haree aprezentasaun projetu no hala’o serimónia kuda ai-horis simbóliku.
Projetu ne’e hetan apoiu husi Sheikh Mohamed bin Zayed Al Nahyan durante vizita ofisiál Prezidente Ramos-Horta ba EAU iha 2023. Komplexu ne’e sei fornese akomodasaun seguru no modernu ba estudante universitáriu feto sira to’o 300.
Durante vizita iha Dili, Ministra Al Kaabi mós hala’o enkontru bilaterál ho Ministru Negósiu Estranjeiru no Kooperasaun no Ministru Finansa, no hala’o vizita kortezia ho Vise-Primeiru-Ministru. Nia mós partisipa iha resepsaun amizade ne’ebé organiza husi Embaixadór EAU, Abdulla Salem Aldhaheri.
Timor-Leste no EAU estabelese relasaun diplomátika iha 13 Novembru 2009. Asinatura Memorandu Entendimentu kona-ba Projetu Rezidénsia Estudante Feto iha Maiu 2026 hametin liután kooperasaun entre nasaun rua.
Prezidente Ramos-Horta mós regularmente partisipa iha serimónia Prémiu Zayed ba Fraternidade Umana no elojia kompromisu EAU nian ba pás no toleránsia.
EAU planeia atu estabelese embaixada iha Dili, ne’ebé Prezidente Ramos-Horta konsidera hanesan pasu signifikativu ida atu aprofunda relasaun bilaterál entre Timor-Leste no EAU.
Vizita Ministra Noura Al Kaabi no delegasaun EAU ba Timor-Leste sei remata iha Tersa-feira, 1 Setembru 2026.
Jornalista: David da Costa
