Díli, 30 Agostu 2026, (Iklik.Info)– Prezidente Repúblika (PR), José Ramos-Horta, hateten, Timor-Leste komemora aniversáriu ba dala 27 Loron Konsulta Populár, ne’ebé marka votasaun istóriku iha 30 Agostu 1999. Loron ida ne’e konsidera hanesan momentu importante ida ne’ebé muda destinu Timor-Leste no sai parte importante husi prosesu ba independénsia nasaun.
“Ohin, ita marka Aniversáriu ba dala 27 dezde ita nia votasaun istóriku ba referendu iha 30 Agostu 1999, loron ida ne’ebé muda ita nia nasaun nia destinu ba nafatin,” dehan Prezidente José Ramos-Horta, iha komunikadu ofisiál ne’ebe Iklik.Info asesu husi Palásiu Prezidensiál Bairu-Pite, Domingu 30/08.
Iha komemorasaun tinan 27 ne’e, povu Timor-Leste hanoin fila-fali sakrifísiu, luta no korajen husi jerasaun sira uluk nian ne’ebé kontribui ba realizasaun aspirasaun povu Timor-Leste. Loron Konsulta Populár mos sai oportunidade atu fó onra ba sira ne’ebé sakrifika sira nia moris no esforsu ba liberdade no pás.
“Bainhira ita komemora loron memorável ida ne’e, ita hanoin fila-fali sakrifísiu sira ne’ebé kle’an no matenek ne’ebé orienta ita nia povu. Ita nia fuan nakonu ho gratidaun ba sira ne’ebé maka mai antes ita no Ita nia espíritu eleva ho futuru ne’ebé ita harii hamutuk,” Dehan Ramos-Horta.
Iha komemorativu memorável ne’e, Timor-Leste mak povu ida no nasaun ida ne’ebé kesi ho istória komún. Durante tinan 27 liuba, nasaun ne’e hetan independénsia no konsege haburas pás, inklui transformasaun husi adversáriu sira uluk sai belun no dezenvolve sistema demokrátiku ne’ebé rekoñese liuhusi komunidade internasionál.
Maski Timor-Leste hetan pás no estabilidade, mensajen ne’e hateten katak pás presiza kompromisu no responsabilidade loroloron. Unidade nasional ne’ebé harii liuhusi luta tenke kontinua sai fundasaun ba dezenvolvimentu no konstrusaun nasaun iha futuru.
“Pás presiza ita nia kompromisu loroloron. Ita tenke asegura katak unidade ne’ebé ita harii iha luta sai hanesan fundasaun ba buat hotu ne’ebé ita harii iha loron ohin no ba oin,” nia afirma.
Foin-sa’e sira Timor-Leste iha papél nu’udar futuru nasaun, inklui iha área diplomásia, siénsia, arte no lideransa. Foin-sa’e sira atu valoriza edukasaun, rejeita divizaun no kontribui ba komunidade ho orgullu, integridade no esperansa.
“Ba foin-sa’e sira Timor-Leste nian, Imi moris iha liberdade. Imi mak ita nia futuru diplomata, sientista, artista no líder sira. Kaer metin aprendizajen. Rejeita divizaun no tentasaun sira ne’ebé estraga ita nia komunidade. Hasa’e aas bandeira Timor-Leste nian ho orgullu, integridade, no esperansa,”Ramos-Horta hato’o mensajen ba foin-sa’e sira.
Iha área dezenvolvimentu, nesesidade atu kontinua kombate kiak, hadi’a asesu ba kuidadu saúde no garante oportunidade edukasaun no dezenvolvimentu ba labarik hotu-hotu, inklui sira ne’ebé moris iha área rurál.
“Bainhira ita hateke ba oin, ita tenke kontinua serbisu ne’ebé sei iha. Ita tenke halakon kiak, habelar kuidadu saúde, no asegura katak labarik hotu-hotu, iha aldeia hotu-hotu, iha oportunidade atu mehi no hetan susesu,” Dehan Ramos-Horta.
Komemorasaun Loron Konsulta Populár ba dala 27, 30 Agostu 2026, sai oportunidade atu fó onra ba sakrifísiu husi jerasaun sira uluk, hametin pás no unidade nasional, no haree ba futuru Timor-Leste ho esperansa no determinasaun.
Jornalista: David da Costa
