DILI-30 Agostu 2026 (I-klik.info)- Komite Central FRETILIN (CCF) hala’o reuniaun ida hodi halo analiza klean ba situasaun polítika ne’ebé daundaun ne’e Timor-Leste hakat liu hela. Reuniaun ida ne’e mós halo diskusaun hodi hare ho krítiku saida mak FRETILIN bele halo no tenki halo iha situasaun ida ne’e.
Sekretariu Jerál no Prezidente Interinu FRETILIN nian, Mari Alkatiri esplika, reuniaun Komite Central ida ne’e hala’o iha momentu ida ne’ebé krítiku tebes iha Nasaun no partidu nia vida.
“FRETILIN hakat iha dalan no tempu ida ne’ebé naruk tebes ona no liuhosi mudansa oin-oin iha tempu oin-oin iha faze diferente vida Timor-Leste nian en termus estrutura no polítika sira,” dehan Mari Alkatiri
Nia esplika, ho mudansa iha realidade ohin loron, Komite Central presiza atu diskitu no hare oinsa mak FRETILIN bele moderniza an hodi responde ba mudansa dezafiu hosi ne’e ba oin atu bele kumpriende diak liu povu no nasaun nia problema sira no fo resposta ne’ebé adekuadu
Durante reuniaun membru sira Komite Central FRETILIN nian halo diskusaun klean no nota ho preokupasaun boot katak Timor-Leste monu ona iha pegada krimi organizadu internasionál no tamba ne’e presiza atu harii konsiensia komum ida kona-ba importansia no urjensia atu salva Timor-Leste hosi situasaun ida ne’e molok sindikatu krimi organizadu sira halo State Capture ka domina Estadu Timor-Leste nia orgaun soberania sira.
Alen de halo analiza, Komite Central FRETILIN mós aprova rezolusaun 8 ne’ebé sei tulun FRETILIN hala’o diak liu no foku ba prioridade sira prosesu modernizasaun partidu nian, hanesan rezolusaun hodi fo omenajen póstumu ba Saudozu Presidente Francisco Guterres “Lú-Olo.”, FRETILIN sei fo prioridade ba Partidu no Povu Timor-Leste no ba ida ne’e sei la aprezenta kandidatura rasik ba eleisaun Prezidensiál tinan-2027, harii Komisaun Nasionál Preparasaun no Organizasaun ba VI Kongres Nasionál FRETILIN nian no Eleisaun Jerál Dahitu, paridade demokrátika no kuota reprezentasaun feto nian, ne’ebé deside hodi hasa’e reprezentasaun feto nian ba 40% iha kargu eletivu hotu-hotu iha FRETILIN nia laran no Rezolusaun Nú. 08/CCF-5°/VIII/2026 kona-ba Transladasaun Restus Mortais Bispu sira nian mai Timor-Leste hodi saúda inisiativa transladasaun ba saudozu Amu Bispu sira; Dom Jaime Garcia Goulart, Dom José Joaquim Ribeiro, Monsiñor Martinho da Costa Lopes no Dom Alberto Ricardo da Silva.
Jornalista: Filomena da Conceicao
