Dili, 28 de Agostu 2026 (I-Klik.info)-Liuhusi deklarasaun ne’ebé Arif Abdullah Sagram presta ba media balun ho liafuan ‘Tiba tiba Timor Medeka’ hetan paresaun makaas husi joven resistensia iha nia rezidensia Markoni Dili, nune’e iha loron 28 fulan agostu tinan 2026 madrugada hetan asaltu husi ema deskonesidu ba Arif nia rezidensia iha Markoni Dili hodi rezulta nia uma vidru balun rahun, nune’e Arif Adbullah Sagram hato’o nia pedidu sinseru deskulpa no rekoñese nia sala.
Arif klarifika, intervista ne’ebé nia halo iha parte balun ho intensaun ba edukasaun tanba maski nasaun iha osan barak maibe kuandu laiha edukasaun mak labele dezenvolve nasaun, nune’e deklarasaun ne’ebé nia halo ne’e fokus ba edukasaun.
Husi deklarasaun ne’ebé Arif hato’o ba media balun nee husu nia komparasaun entre nasaun Arab ho Timor Leste, nune’e nia kompara katak sira jerasaun mai husi Yemen no nasaun Arab sira iha negosiu hodi dezenvolve sira nia rain, tanba ne’e nia mos hakarak atu nasaun Timor Leste presiza investe iha edukasaun atu bele fo koñesimentu hodi dezenvolve nasaun.
“Dala ida tan ba kolega luta nain sira ho povu timor leste tomak husi hau nia fuan laran hau husu deskulpa no éspera ba oin buat nee sei laiha tan” dehan Arif Abdullah Sagram liuhusi klarifikasaun ba media iha nia rezidensia Markoni Dili, (28/08).
Nia dehan tan, iha parte dader nia mos hato’o informasaun ba parte polísia tanba ema deskonesidu ne’ebé tuda nia uma maibé nia sei la informa ba polísia kona-ba nia uma rahun, tanba nia uma mos uza ba atividade relijiaun Musulmana nian nune’e nia hatoo ba polísia atu hetan seguransa hodi nia maluk sira komprende katak Timor Leste nasaun ne’ebé iha seguransa di’ak.
Jornalista: Silvino Freitas
