Liquiça, 21 Agostu 2026 (Iklik.Info)–Tribunal Judisiál Primeira Instánsia Dili (TJPID) altera medida koasaun hosi Termu Identidade no Rezidénsia (TIR) ba Prizaun Preventiva (PP) ba arguidu nain-13 ne’ebé alegadamente envolve iha kazu scam call centre iha área Ulmera, Munisípiu Likisá. Desizaun ne’e permite DSIK-PNTL ezekuta mandadu prizasaun no lori arguidu sira ba Prizaun Becora atu kumpri medida koasaun tuir orden tribunal.
Iha Komunikadu ofisiál ne’ebé Iklik.Info sita katak, Autoridade Seguransa Diresaun Servisu Investigasaun Kriminál (DSIK), iha Polísia Nasional Timor-Leste (PNTL), ezekuta mandadu prizasaun ho NUC: 0248/26.PNSIC ba arguidu nain-13, hafoin Tribunal Judisiál Primeira Instánsia Dili altera medida koasaun hosi Termu Identidade no Rezidénsia (TIR) ba Prizaun Preventiva (PP).
“Arguidu nain-13 ne’e alegadamente envolve iha kazu scam call centre ne’ebé hela iha área Ulmera, Munisípiu Likisá,” dehan iha Komunikadu Imprensa ne’ebe Iklik.Info sita husi Media Ofisiál PNTL iha pagina Facebook, Sexta 21/08.
Iha Komunikadu ne’e haktuir, ezekusaun mandadu prizasaun ne’e hala’o tuir desizaun Tribunal Judisiál Primeira Instánsia Dili, ne’ebé determina alterasaun medida koasaun ba Prizaun Preventiva ba arguidu sira ne’ebé atualmente iha prosesu investigasaun kona-ba alegasaun envolvimentu iha atividade scam call centre.
“Hafoin ezekusaun mandadu, arguidu nain-13 lori ba Prizaun Becora atu kumpri medida Prizaun Preventiva, tuir orden no desizaun autoridade judisiál kompetente,” dehan iha Komunikadu ne’e.
DSIK-PNTL kontinua hala’o prosesu investigasaun tuir prosedimentu legál atu apura faktu no evidénsia sira relasiona ho kazu ne’e, no garante katak prosesu investigasaun hala’o ho respeitu ba lei no direitu fundamentál ba parte hotu.
PNTL reafirma kompromisu atu kontinua kombate atividade kriminál, inklui fraude no forma krime sibernétika sira, liuhusi investigasaun profisionál no kolaborasaun ho autoridade judisiál, ho objetivu atu garante seguransa no ordem públika iha Timor-Leste.
Entretantu antes, TJPID aplika medida aprezentasaun periodika, proibisaun auzensia no medida kausaun ba arguidu na’in-76 iha Ulmera ne’ebe envolve iha Scam Call Centre. Maioria tenke depozita osan kausaun hamutuk USD 2.500, no arquidu ida tenke depozita USD 10.000, alende kontinua ho medida Termu Identidade no Rezidensia (TIR).
Maibé depois loron kuarta 19 Agostu 2026, Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) hatun despaixu husi TJPID ho NUC: 0248/26.PNSIC altera medida koasaun hosi Termu Identidade no Rezidénsia (TIR) ba Prizaun Preventiva (PP) ba arguidu nain-13 ne’ebé envolve iha kazu scam call centre maibè arguidu sira na’in-63 halai lakon hotu ona.
Jornalista: David da Costa
