Díli, 4 Agostu 2026 (Iklik.info)–Autoridade Timor-Leste liu hosi Servisu Migrasaun, Ministeriu Interiór, ofisialmente entrega suspeitu krime transnasionál sidadaun Xina na’in rua ba ekipa Interpol Beijing, iha loron tersa (04/08), hafoin suspeitu sira tama iha lista Interpol tanba akuzasaun envolve iha fraude fiskál, korupsaun no prostituisaun organizadu.
Iha komunikadu Ofisial ne’ebe Iklik.info asesu katak, Ministeriu Interio liu hosi Servisu Migrasaun, iha loron tersa ne’e ofisalmente halo auto entrega fuzitivu Interpol nain 2 ho inisial ZX no NB ba Interpol Repulika Popular Xina tanba envolve iha krime fraude fiskal no prostituisaun organizadu.
Entrega ne’e hala’o iha sede sentrál Servisu Migrasaun, Vila Verde, Díli, hanesan rezultadu husi kooperasaun entre Timor-Leste no Interpol iha esforsu hodi kombate krime transnasionál no asegura katak suspeitu sira hasoru prosesu justisa iha nasaun ne’ebé buka sira.
Tanba tuir informasaun husi Servisu Migrasaun, suspeitu ho inisial ZX akuzadu envolve iha kazu fraude fiskál no korupsaun. Tanba kazu refere, nia tama ona iha lista Interpol hanesan ema ne’ebé buka husi autoridade Xina.
Enkuantu suspeitu ho inisial NB akuzadu organiza no responsabiliza ba atividade prostituisaun organizadu. Nia mos tama iha lista Interpol Beijing tanba konsidera envolve iha atividade kriminál transnasionál.
“Suspeitu ZX tama lista Interpol tanba envolve iha fraude no korupsaun enkuantu NB envolve an hodi organiza no responsabiliza ba atividade prostituisaun. Tanba atividade kriminál ne’e, suspeitu na’in rua identifikadu hanesan kriminozu nivel aas ne’ebé tama iha lista mean husi Interpol Beijing nian,” dehan iha komunikadu Imprensa ne’ebé Iklik.info asesu iha Pagina Servisu Relasaun Publika PNTL, Tersa 4/08.
Nune’e Diretór Ezekutivu Servisu Migrasaun, Komisáriu Asistente Polísia Jorge Monteiro, hamutuk ho diretór jerál, diretór nasionál no xefi gabinete, lidera serimónia entrega ofisiál ba ekipa Interpol Beijing. Ida ne’e nu’udar medida ida atu reforsa kooperasaun internasionál entre instituisaun sira iha kombate krime organizadu.
Hafoin remata prosesu administrativu no dokumentasaun hotu, ekipa Servisu Migrasaun no Interpol lori suspeitu na’in rua ba Aeroportu Internasionál Nicolau Lobato, Díli, atu sa’e aviaun fila ba Xina. Transferénsia ne’e hala’o tuir prosedimentu legal no mekanizmu kooperasaun internasionál ne’ebé vigora.
Entertantu autoridade sira espera katak kooperasaun entre Timor-Leste ho Interpol bele kontinua hametin esforsu atu prevene no kombate krime transnasionál, inklui fraude, korupsaun, prostituisaun organizadu no atividade ilegal seluk ne’ebé bele ameasa seguransa no estabilidade rejionál.
Reportajen: David da Costa
