Kordenadora EBF Leguimea-Ermera Luiza Soares dehan, eskola refere infrenta difikuldade sira hanesan material sira ne’ebe atu apoia profesor sira hodi hanorin estudante sira, tanba antes nee material sira hanesan livru no material didatiku sira hodi hanorin estudante sira sempre aloka husi nasional ba eskola maibe ba dadaun ne’e la aloka ona ba eskola nune’e sira uza kondisoens hodi sosa maibé la sufisiente.
“Livru planu lisaun ka mata dalan sira ami kaer atu apoiu ba labarik sira ida ne’e mak ami presiza tebes” dehan Koordenadora EBF Leguimea-Ermera Luiza Soares ba jornalista sira iha Leguimea, (04/08).
Entretantu eskola refere mos infrenta hela problema saneamentu liuliu bee ne’ebe apoia sira iha casa de banho nian, tanba tranzmisaun bee nian uza de’it kanu masa nune’e sempre tohar nune’e difikulta bee atu mai regularmente no la seguru, nune’e mos dadaun ne’e sira hasoru problema konsensoen eskolar hanesan komputador atu apoia sira hodi halo relatorio eskola nian tanba dadaun ne’e kada eskola tenke halo rasik sira nia relatoriu.
“Ami iha eskritoriu nee fasilidade atu apoia ami nee tanba agora konsensoen sira balun presiza online, hanesan relatóriu sira la hanesan uluk sentru mak halo maibe ami filial sira mos bele halo entaun presiza apoia material eletroniku sira hanesan Laptop ruma ka printer ruma apoia ami iha relatóriu ruma” dehan koordenadora Luiza.
Luiza informa tan, lina eletrisidade ne’ebe mate lakan mos difikulta mos estudante sira atu bele estuda iha tempu kalan, nune’e iha ekipa balun husi CCP mak apoia solar panel ba estudante sira atu bele estuda iha tempu kalan, nune’e mos maski dadaun ne’e governu iha ona programa hafurak eskola maibe husi sira nia parte nafatin infrenta moru protesaun ba eskola no fatin ba estudante sira atu halimar iha tempu rekreu ne’ebe la dun seguru kuandu transporte sira movimentu ba mai.
“Ami iha ne’e estudante difisiente iha ida maibe material ba rampa ba estudante difisiente mos laiha” informa profesora Luiza Soares.
Liga ho preokupasaun refere koordenadora nee informa tan katak, sira informa no rekomenda hotu ona difikuldade sira nee ba edukasaun nasional liuhusi sentru eskola maibé too dadaun ne’e simu deit resposta ruma katak hein de’it.
Entretantu Eskola Bazika Filial 196 Leguimea-Ermera total estudante 225 ho profesor hamutuk 9 mane 6 feto 3 maibe iha profesor nain rua mak la ativu tanba ida idade no ida moras nune’e eskola refere mos preokupa hela manorin nain iha eskola refere, nune’e eskola refere hahu husi primeiru ano too sexto ano, dadaun ne’e estudante sira utiliza sala aula 3 tanba ba oras dader ho lokraik nian no sala aula 3 dadaun ne’e iha hela prosesu rehabilitasaun.
Jornalista: Silvino Freitas
