DILI, 13 Outubru 2026 (I-klik Info) – Sekretáriu Estadu Formasaun Profisionál no Empregu (SEFOPE), Rogério Araújo Mendonça, hateten revizaun ba saláriu mínimu ne’ebé hahú kedas husi 2012, agora konklui ona no hein de’it aprezentasaun iha Konsellu Ministru.
“Kona-ba saláriu mínimu iha tinan 2024, liuhusi Konsellu Nasionál Traballu ami prepara ona revizaun ba saláriu mínimu ne’ebé hahú kedas no altera iha momentu ne’ebá iha 2012,” Rogério hateten.
Nia esplika, tuir vizaun Konsellu Nasionál Traballu, kada tinan rua tenke halo revizaun liuhusi estudu no análiza ba situasaun rai-laran, hodi haree se merese duni halo revizaun ka lae.
Hanesan Prezidente Konsellu Nasionál Traballu, nia sente kontente tanba proposta ne’ebé SEFOPE haruka ba MCAE konklui hotu ona.
“Proposta ne’ebé SEFOPE haruka ba MCAE ne’e hotu-hotu konklui ona, falta de’it nivel polítiku mak seidauk halo aprezentasaun. Prosesu hein de’it Vise Primeiru Ministru atu hato’o iha Konsellu Ministru,” nia dehan.
Desizaun ikus atu hetan aprovasaun ka lae, iha Konsellu Ministru nia liman. SEFOPE servisu hamutuk ho liña Ministériu sira no halo konsultasaun ho setór públiku no makro ekonomia hodi halo análiza ba lei saláriu mínimu nian.
Sekretáriu Estadu ne’e klarifika katak saláriu mínimu ne’e vale de’it ba setór privadu ne’ebé emprega traballadór sira, la vale ba administrasaun públika hanesan funsionáriu, PNTL, saúde no seluk tan. Tan ne’e la perturba Orsamentu Jerál Estadu nian.
Tuir istória, iha 2012 liuhusi rezolusaun UNTAET saláriu mínimu $85 no sa’e ba $115, maibé ekonomia rai-laran normal hela.
“Husi tinan sira ne’e setór privadu balun produtivu tebes. Se ita sa’e ba $154 ne’e husi makro estatístika, maibé ami-nia rekomendasaun maka sa’e ba $160 dollar. Ha’u hanoin katak ne’e normal no la fó implikasaun,” nia hatutan.
Nia husu ba públiku atu komprende mekanizmu ne’e, tanba prosesu revizaun halo tuir dalan legál no estudu kle’an.
Jornalista Filomena da Conceicao
