Díli, 14 Agostu 2026 (Iklik.info)– Pelican Paradise kontesta Rezolusaun Governu Timor-Leste ne’ebé foti desizaun hodi fila-fali rai ba projetu investimentu iha Tasi Tolu no Tibar, no husu Governu atu respeita Akordu Espesiál kona-ba Investimentu ne’ebé asina ona ho Estadu iha 3 Janeiru 2022. Tanba akordu ne’e legalmente vinkulativu no la bele anula simplesmente liuhusi rezolusaun Governu, tanba obrigasaun kontratual iha parte rua.
“Pelican Paradise simu ona ho atensaun Rezolusaun ne’ebe Governu Timor-Leste hasai kona- ba ami nia projetu investimentu iha Tasi Tolu no Tibar. Ami la konkorda ho maneira ne’ebe asuntu ida-ne’e deskreve hanesan buat ida ne’ebe bele rezolve simplesmente liuhusi Rezolusaun Governu nian ne’ebe haruka fila fali rai investimentu nian,” dehan iha komunikadu ne’ebe Iklik.info sita iha pagina ofisial Facebook, sexta ne’e.
Pelican Paradise tama iha Akordu Espesial kona-ba Investimentu ne’ebe formal no legalmente vinkulativu ho Estadu Timor-Leste iha loron 3 Janeiru 2022. Akordu ne’e estabelese obrigasaur entre parte rua.
Tanba ne’e, relasaun kontratual ida labele redus de’it ba desizaun Governu nian kona-ba dezempeñu parte ida nian, enkuantu la konsidera obrigasaun ne’ebe parte seluk asume ona. Pelican Paradise gasta ona maizumenus tinan 18 servisu hamutuk ho Governu Timor-Leste tui-tuir malu hodi dezenvolve projetu ne’e.
“Durante periodu ne’eba, ami investe rekursu finanseiru signifikativu, halo planeamentu no dezeñu, kompleta obra preparatóriu substansia sira no hahu atividade konstrusaun sira,” hateten iha komunikadu ne’e.
Projetu ne’e hasoru ona atrazu signifikativu, inklui asuntu sira ne’ebe relasiona ho infraestrutura no obrigasaun sira seluk ne’ebe nu’udar responsabilidade Estadu nian tuir kuadru investimentu nian. Asuntu sira ne’e hatete no hato’o beibeik ona ba autoridade relevante sira iha tinan barak nia laran.
Tanba ne’e, la loos atu aprezenta istoria Pelican Paradise nian hanesan de’it investidor ida ne’ebe la kumpre nia promesa sira. Obrigasaun kontratual hotu-hotu iha parte rua. Obrigasaun investidor nian labele ezamina ketak husi obrigasaun Estadu nian.
Pelican Paradise respeita Governu Timor-Leste no autoridade husi ninia instituisaun sira. Maibé, respeitu ba autoridade governamentál tenke akompaña ho respeitu ba estadu direitu, seguransa legál kontratu sira nian, no boa-fé.
Governu rasik antes ne’e rekoñese ona Akordu Espesiál ba Investimentu nu’udar enkuadramentu legál ne’ebé regula investimentu ne’e. Akordu ne’e asina formalmente husi reprezentante sira husi Estadu no Pelican Paradise no deskreve públikamente iha momentu ne’ebá hanesan pasu importante ida ba oin ba projetu ne’e.
“Tanba ne’e, ami fiar katak públiku merese atu hetan informasaun kompletu no ekilibradu kona- ba saida maka akontese iha tinan 18 ikus ne’e, inklui obrigasaun sira ne’ebé maka parte rua no razaun sira tanba saida maka projetu ne’e hetan atrazu sira,” iha komunikadi ne’e afirma.
Pelican Paradise sei kontinua bazeia ninia asaun sira ba faktu sira, dokumentasaun ne’ebé eziste no akordu sira ne’ebé halo ona ho Estadu. Pelican Paradise sei la responde ho atake pesoál ka retórika politika.
Notísia Relevante: https://iklik.info/akordu-investimentu-remata-governu-husu-pelican-paradise-group-entrega-rai-fila-fali/
Pelican Paradise nian kompromisu ho Timor-Leste nunka sai kestaun. Asuntu ida ne’e envolve prinsípiu ida ne’ebé boot no luan liután, bainhira Estadu ida tama iha akordu investimentu ida ne’ebé vinkulativu, investidór sira tenke bele fiar katak kompromisu sira ne’ebé Estadu halo sei hetan respeitu
Prinsípiu ne’e importante la’ós de’it ba Pelican Paradise, maibé ba investidór nasionál no internasionál sira hotu ne’ebé konsidera Timor-Leste hanesan fatin atu halo investimentu. Pelican Paradise komprometidu nafatin ba Timor-Leste no atu rezolve kestaun ida ne’e ho forma ida ne’ebé justu no transparente, tuir kompromisu ne’ebé parte rua halo ona.
Jornalista: David da Costa
