Dili, 14 Agosto 2026 (I-Klik.info)-Liuhusi sesaun diskursu ba aniversario ezisténsia Unidade Espesial Polísia (UEP) ba dala sanulu resin hitu (17) Komadante Jerál Polísia Nasionál Timor Leste (PNTL) Komisáriu Assitente Afonso dos Santos dehan, momentu selebrasaun aniversariu UEP nian ne’e momentu ida ne’ebe atu fo rekonesementu ba kontribuisaun ne’ebe UEP halo ba PNTL liuhusi fo seguransa ba nasaun ho povu, nune’e hatoo mos agresimentu ba parseiru nasional no Internasionál sira hotu ne’ebe durante tinan hirak nia laran fo apoiu ba kapasitasaun no dezenvolvimentu PNTL nian liuliu iha UEP.
“Liafuan agradesimentu espesial ba GNR Portugal, Australia ba sira nia kooperasun no formasaun konsellu no apoiu kontinua, hau mos hakarak hatoo ami nia apresiasaun kontinua ba governu no instituisaun sira seluk Repúblika Popular China, Repúblika Korea Sul, Estadus Unidus America no Repúblika Indonesia ba apoiu no kooperasun ne’ebe kontribui ona hotu hametin ita nia forsa polísia nia kapasidade” dehan Komadante Jerál PNTL Komisáriu Asistente Afonso do Santos iha ambitu selebrasaun aniversariu UEP ba dala 17 iha Bairo-Pite, (14/08).
Komadante Jerál mos solisita ba ofisial no ajentes UEP sira katak, atu kontinua hatudu prontidaun tanba ezistensia durante tinan 17 ho dedikasaun disiplina, profesionalizmu no espiritu servisu ba nasaun maski dalaruma halao servisu iha sirkunstánsia no difisil tanba ne’e merese hetan rekonesementu no respeitu husi PNTL tomak, nunee kontinua kumpri misaun ho disiplina korajen profesionalismu no respeitu ba sidadaun sira.
“Hau repete tan dala ida respeitu ba sidadaun sira fo onra nafatin ba farda ne’ebe imi hatais no valores PNTL nian” solisita Komadante Jerál PNTL Komisáriu Asistente Afonso do Santos.
Fatin hanesan Ministériu Interior (MI) Francisco da Costa Guterres dehan, UEP unidade ida ne’ebe importante iha instituisaun PNTL nune’e unidade refere iha importantasia tabes hodi kumpri misaun ne’ebe polísia nasional ezerse, nune’e mos unidade refere infrenta mos risku ho situasaun ne’ebe esesionais maibe unidade ne’e nafatin firme hodi halao nia misaun hodi lori situasaun ne’ebe hakmatek ba povu no nasaun nune’e nasaun bele kontinua hala’o dezenvolvimentu.
“Mandatu ne’ebe hatoo ba ita boot sira mandatu ne’ebe ejistente teb-tebes, ne’ebe husu ba ita boot sira atu halao ho disiplina ho korajen no elevadu ho sentidu misaun ne’ebe ita boot sira iha” dehan MI Francisco da Costa Guterres iha ambitu selebrasaun aniversariu UEP iha Bairo-Pite, (14/08).
MI Francisco akresenta liu tan katak, aniversariu UEP tinan nee iha momentu kritika nia laran liuliu fenimena krime transnasionál nune’e ejiji tebes UEP atu bele halao servisu hodi kombate hodi hamutuk ho instituisaun relevante hotu hotu hodi fo resposts ne’ebe loloos disiplinadu ho teknika neebe diak hodi kombate, situasaun ne’ebe la diak iha ita nia rain.
“Iha okaziaun ida ne’e moos hatoo ba ita boot sira katak governu kompremitidu atu kontinua investe ba PNTL no moos ba UEP atu tau kondisaun ne’ebe loloos ho relevante atu bele halao ita boot sira nia servisu ho didiak” dehan MI Francisco.
Jornalista: Silvino Freitas
