Dili, 01 de Outubru de 2026(I-Klik.info)-Relasiona ho insendiu ne’ebé akontese iha fulan setembru iha merkadu Taibesi no eis merkadu Komoro, too dadaun ne’e Polísia Nasionál Timor Leste (PNTL) liuhusi komandu munisípiu Dili sei kontinua halo hela investigasaun ba motivu husi insendiu refere maibe iha merkadu Taibesi informasaun husi testemuna balun deklara katak impaktu husi fugaun mak nakfera.
Komadante Munisípiu Dili Komisariu Assitente Orlando Gomes dehan, insendiu iha merkadu taibesi iha loron 25 fulan setembru tinan 2026 oras tuku sanuku kalan, ne’ebé rezulta baraka vendedor hamutuk 20 ne’ebé hetan estragus total, maka komandu munisípiu Dili sei kontinua ho prosesu investigasaun ba insendiu refere maibe iha informasaun balun ne’ebé komandu sira iha terenu katak insendiu merkadu taibesi ne’e akontese tanba impaktu husi fugaun mak nakfera.
“iha merkadu taibesi no merkadu komoro ita halo hotu prosesu investigasaun maibé ita seida’uk hatene, maibe hau hakarak hateten tuir informasaun husi testemuna sira katak kuandu insendiu nee mosu tanba provoka husi fugaun rebenta nee husi taibesi nian” dehan Komadante Munisípiu Dili Komisariu Assitente Orlando Gomes iha eskuadra Dom Aleixo Aimutin, (1/10).
Enkuantu insendiu ne’ebé akontese mos iha loron 27 fulan setembru iha dader oras tuku ualu liu minutu tolu nulu iha eis merkadu Komoro hodi halo estragu ba uma komunidade sira nian hamutuk 53 ne’e husi parte polísia kontinua halo prosesu investigasaun tanba akontese insendiu refere uma nain halo hela nia atividade faan obralan iha merkadu, nune’e too dadaun ne’e parte polísia seidauk hatene motivu husi insendiu iha eis merkadu Komoro.
“iha merkadu komoro iha momentu neeba uma nain laiha uma maibé ba faan obrolan, tanba ne’e ita halo hela prosesu investigasaun para hatene motivu loloos han nee tanba saida tanba fiu eletrisidade ka, nee mak sei prosesu hela” konklui Komisariu Assitente Polísia Orlando Gomes.
Jornalista: Silvino Freitas
