Díli, 17 Agostu 2026 (Iklik.info)– Xefe Estadu Maiór Jenerál, FALINTIL-Forsa Defeza Timor-Leste (F-FDTL), Tenente-Jenerál Falur Rate Laek, hasoru Primeiru Ministru Kay Rala Xanana Gusmão hodi atualiza kona-ba preparasaun komemorasaun aniversáriu FALINTIL ba dala-51 iha foho Matebian, no mós kona-ba prosesu tranzisaun ne’ebé la’o hela iha instituisaun F-FDTL.
Xefe Estadu Maiór Jenerál, FALINTIL-Forsa Defeza Timor-Leste (F-FDTL), Tenente-Jenerál Falur Rate Laek, hateten, iha enkontru ne’e, atualiza ba Primeiru Ministru Kay Rala Xanana Gusmão, kona-ba preparasaun ikus ba komemorasaun aniversáriu FALINTIL bad ala-51, ne’ebé sei hala’o iha foho Matebian.
“Iha enkontru ne’e ha’u atualiza mós bá Primeiru Ministru kona-ba prosesu tranzisaun ne’ebé la’o hela iha instituisaun F-FDTL,” dehan Xefe Estadu Maiór Jenerál, FALINTIL-Forsa Defeza Timor-Leste (F-FDTL), Tenente-Jenerál Falur Rate Laek, ba Jornalsita sira iha Palásiu Governu, Segunda 17/08.
Nia haktuir, hafoin remata hosi atividade iha Matebian, sei hala’o tan atividade sira iha fronteira, Ramelau no Manuboe Loihunu, nu’udár parte hosi esforsu ba rekonsiliasaun nasionál, ne’ebé inklui dimensaun interna no externa.
Nune’e mós Tenente-Jenerál Falur Rate Laek mós husu apoiu tomak hosi Primeiru Ministru ba prosesu tranzisaun iha F-FDTL, atu bele kontinua hadi’a no hametin instituisaun ne’e, no prepara didi’ak ba jerasaun sira tuir mai.
“Dimensaun interna maka ita sei halo iha foho Matebian rame-rame ne’e, ida externa halo iha Manuboe, ne’ebé ha’u husu apoiu tomak ba maun boot PM nu’udar komandante xefe no harii nasaun ida ne’e,” nia subliña.
Jornalista: David da Costa
