Díli, 26 Agostu 2026 (Iklik.Info)— Autoridade Nasionál, Polísia Nasionál Timor-Leste (PNTL) liuhusi Servisu Investigasaun Kriminál (DSIK), hamutuk ho Servisu Migrasaun (SM) no Diresaun Servisu Informasaun Polísia (DSIP), sobu atividade suspeita Scam Call Centre iha Aldeia Carungulau, Suku Metiaut, Dili, no asegura sidadaun estranjeiru na’in-16, kompostu hosi mane na’in-15 no feto na’in-1, ne’ebé na’in-10 la iha pasaporte iha liman.
Tuir observasaun Iklik.Info iha terenu, kuarta-feira (26/08/2026), mais ou menus tuku 08:00 kalan, ekipa konjunta hosi DSIK, Servisu Migrasaun no servisu intelijénsia tama ba hotel ida iha Aldeia Carungulau, Suku Metiaut, hodi hala’o operasaun ba atividade ne’ebé suspeitu liga ho Scam Call Centre.
Iha operasaun ne’e, autoridade sira asegura sidadaun estranjeiru na’in 16, kompostu hosi mane na’in 15 no feto na’in 1, ho nasionalidade Xina, Mianmar no Repúblika Suriname.
Alende asegura ema sira ne’e, autoridade seguransa mós halo buska no apreensaun ba evidénsia sira, inklui aparellu Starlink haat ne’ebé instala iha hotel laran no suspeitu uza ba atividade Scam Call Centre.
Nune’e mós Autoridade Seguransa sira mós prende telemóvel kuaze hamutuk 25 resin, karreta ida no sasán sira seluk ne’ebé suspeitu iha ligasaun ho atividade ilísitu scam call center.
Durante prosesu buska no apreensaun, autoridade sira identifika sidadaun estranjeiru na’in 6 de’it maka iha pasaporte, enkuantu sidadaun na’in 10 la iha pasaporte iha liman.
Enkuantu tuir informasaun hosi traballador Hotel California, ne’ebé husu atu nia identidade la publika, iha hotel ne’e kada loron selu US$50,00 to’o US$70,00, maibé sidadaun estranjeiru sira ne’e arenda kada kuartu ho presu entre US$700 to’o US$1.000, depende ba kualidade no tipu kuartu iha hotel refere.
Xefe Suku Metiaut, Pedro da Silva Barreto hateten, Sidadaun estranjeiru iha ne’e, ho sira nian menejer ba to’o iha sede suku hodi fó rekoñesimentu katak sira mai iha ne’e loke restorante de’it, maibé halo fali atividade ilísitu scam call center ne’e autoridade lokál lá hatene.
“Sira fó hatene autoridade maka loke restorante no sira mos husu ha’u para haruka joven sira na’in rua mai servisu ho sira, maibé sira halo fali programa sira seluk ha’u la hatene. Mas ikus Polísia detekta katak sira halo atividade scam call centre,” dehan xefe suku Metiaut.
Nune’e mos autoridade Suku Metiaut agradese ba autoridade seguransa sira, tanba bele deskobre ona atividade ilísitu scam call center.
Hafoin operasaun ne’e remata, autoridade seguransa sira desloka kedas sidadaun estranjeiru hamutuk na’in 16 ba iha Komandu jerál PNTL Kaikoli hodi kumpri 72 oras no kontinua ba Prosesu investigasaun.
Operasaun ne’e halo hanesan parte hosi esforsu autoridade seguransa atu prevene no investiga atividade ilísita ne’ebé suspeitu hala’o iha territóriu Timor-Leste.
Jornalista: David da Costa
