Díli, 12 Agostu 2026 (Iklik.info)– Nunu governu konstitusional liu husi reuniaun Konsellu Ministru kuarta ne’e, determina katak Pelican Paradise Group Limited tenke entrega fila-fali rai ba Estadu ne’ebé antes fó ona ba empreza ne’e iha ámbitu Akordu Espesiál Investimentu (AEI), tanba akordu investimentu refere remata ona.
Iha proposta husi Vise Primeiru Ministru no Ministru Koordenadór Asuntu Ekonómiku, Konsellu Ministru aprova proposta Rezolusaun Governu nian ne’ebé determina devolusaun/entrega fila-fali ba Estadu rai sira ne’ebé fó ona ba sosiedade Pelican Paradise Group Limited iha ámbitu Akordu Espesiál Investimentu (AEI) relevante, ne’ebé aprova liuhusi Rezolusaun Governu nú.133/2021, loron 15 fulan-dezembru.
“Konsidera katak Akordu Espesiál Investimentu (AEI) refere remata ona ninia efeitu no ninia terminasaun komunika ona ba empreza, rai sira ne’ebé fó ona iha ámbitu investimentu ne’e tenke entrega fila-fali ba Estadu hanesan na’in,” dehan iha komunikadu ne’ebe Iklik.info sita.
Tanba ne’e iha, rezolusaun ne’e fó knaar ba Vise Primeiru Ministru no Ministru Koordenadór Asuntu Ekonómiku atu promove no koordena asaun nesesáriu hodi asegura restituisaun/entrega fila-fali rai ba Estadu, ne’ebé tenke entrega ho kondisaun livre husi ema no propriedade sira.
Nune’e mos iha rezolusaun ne’e determina mós katak entidade públika relevante hotu, iha ámbitu sira nia kompeténsia, tenke adota aktu administrativu nesesáriu hodi kumpre desizaun ne’e.
Jornalista: David da Costa
