DILI, 15 de Outubro de 2026 (I-KLIK.INFO)-Liuhusi sosializasaun Kombate HIV SIDA ba komunidade no juventude iha suku Kuluhun autoridade lokal konsidera joven mak futuru nasaun nian nune’e tenke hadook an husi moras HIV SIDA, tanba ne’e autoridade husu ba joven sira ne’ebé partisipa iha sosializasaun refere atu bele habelar informasaun combate HIV SIDA nian ne’ebé hetan husi Institutu Nasionál Combate SIDA (INCSIDA) ba iha suku Kuluhun laran.
Xefe Suku Kuluhun Deus Martins dehan, nasaun nia futuru iha joven sira nia liman nune’e husi sosializasaun ne’ebé parte INCSIDA halo iha suku Kuluhun ne’e parte importante tebes ba komunidade iha suku refere tanba nasaun forte presiza komunidade ne’ebé forte no dook husi moras HIV SIDA, nune’e autoridade lokal husu ba joven partisipante sira atu espalla informasaun ba sira nia maluk ne’ebé la partisipa iha sosializasaun refere, nune’e nia éspera ninia joven sira ne’ebé partisipa sei fahe no habelar informasaun ba maluk sira ne’ebé la marka prezensa.
“Informasaun sira hanesan ohin ita rona kona-ba kombate HIV SIDA tanba futuru rai no nasaun iha joven sira nia liman” dehan xefe suku Kuluhun Deus Martins iha suku Kuluhun, (14/10).
Autoridade ne’e afirma tan, iha suku Kuluhun sira iha livru ida ba komunidade sira ne’ebé la’ós orijin husi suku Kuluhun nune’e otel no restaurante sira iha suku Kuluhun sira sempre delega sira nia sefe aldeia ho delegadu no delegada atu tama sai iha bairu ne’ebé sira deskonfia sira sempre foti data ba komunidade sira ne’ebé okupa fatin ninia eleitorál no karik nia ema estranjeiru presiza foti sira nia pasaporte, atu bele arkiva nune’e mosu buat ruma autoridade suku sira bele hatene.
Prezidente INCSIDA Daniel Marcal dehan, INCSIDA halo meiu oioin hodi konvida autoridade seguransa lokal no komunitaria atu halo intervensaun ho materia oioin atu bele hasae ema nia konsensia hodi muda hahalok sira ne’ebé risku kuandu ema iha konsensia ba hahalok risku sira maka automaticamente kazu foun nee moos tun ona, tanba ne’e mak INCSIDA kontinua lao husi aldeia ba too suku no iha munisípiu atinji hotu ona postu falta lima enkuantu sei barak liu maka suku no aldeia.
“Ohin ita iha suku Kuluhun espera ba oin ita iha tan suku balun tan, ita hakarak ema hotu hotu tenke rona mensajen no hatene informasaun kona-ba HIV nian, iha buat rua de’it HIV daet oinsá no prevene halo nusa buat rua ne’e mak importante tebes restu nee lalikan hatene” dehan Prezidente INCSIDA Daniel Marcal iha suku Kuluhun.
Jornalista: Silvino Freitas
