Dili, 05 outubro 2026 (I-klik.Info) – Alumni Parlamentu Foinsa’e Timor-Leste (APFTL), realiza “Workshop Nasionál ba Disseminasaun, Selesaun no Eleisaun”, M-PFN periodu ba da-VI (2027-2029), Objetivu atu rekruta membru foun hahu hosi idade 12 – 17 anus iha teritóriu Timor-Leste, kada postu ema nain mak rua feto ida ho mane ida inklui maluk defisiénsia. Oportunidade ida-ne’e prepara foinsa’e sira nia kapasitasaun ba lideransa patriotismu no nasionalismu iha futuru.
Ministériu Juventude Desportu Arte no Kultura (MJDAK), Nelio Isaac Sarmento hateten, dau-daun ne’e APFTL tama ona ba iha parte da-neen ona konaba rekrutamentu membru Parlamentu foinsa’e programa sira-ne’ebe ita prepara joven sira ba lideransa ne’e hanesan faz parte oinsa joven sira bele sai lider ne’ebe preparadu ba lideransa futuru nasaun nian. Oportunidade ida-ne’e prepara ho kondisoes ne’ebe naton hodi hatene no lalaok administrasaun ne’ebe nasaun adopta. Portantu ita halo tiha prosesu rekrutamentu iha periodu primeiru too periodu da-lima nia mandatu atu remata ona. Entaun ita prepara fali tan ba rekrutamentu foun maibe bainhira ita halo rekrutamentu foun ne’e laos otomatikamente sai membru Parlamentu foinsa’e ne’e laiha ida, maibe rekruta sira mai para fo formasaun ba sira.
“Ita fahe formasaun ba membru rekrutamentu sira konaba oinsa sai lideransa ne’ebe patriotismu no nasionalismu ne’ebe diak iha futuru, neste momentu ita halo rekrutamentu hanesan tinan kotuk rekruta ema nain 142 ne’ebe reprezentante hosi munisipiu hotu maibe prosesu rekrutamentu ne’e sei halo dialogu iha postu administrativu kada postu presiza ema nain rua maibe feto ida no mane ida inklui ema ho defisiénsia.” Dehan Ministru Juventude Desportu Arte Kultura (MJDAK), Nelio Isaac Sarmento, ba jornalista sira iha salaun Nahe biti boot MJDAK, segunda-feira, 05/10.
Nia dehan, espera rekrutamentu ida-ne’e bele sai diak no informa ba familia pai ho mae sira iha area rurais prepara labarik sira ne’ebe potensiál atu sai labarik ne’ebe diak iha futuru nasaun nian. Nune’e labarik foinsa’e sira ne’ebe iha kualifikasaun bele hetan formasaun adisionál iha kapitál Dili.
“Kada tinan APFTL halo rekrutamentu ba ema nain 142 jovens atu sai membru Parlamentu foinsa’e maibe rekruta foinsa’e sira ne’ebe tur iha banku pre-sekundaria no sekundária sira deit. Hanoin atu aumenta tan ema maibe kbiit orsamentu no fatin kapasitasaun, nune’e ba futuru ita haree kapasitasaun no haree kondisoes depois halo rekrutamentu barak liu-tan.” Nia dehan.
Kada tinan Ministériu sempre aprovadu orsamentu ba programa diaria sira-ne’e.
Iha fatin hanesan Prezidente APFTL Benvinda Gusmão Alves hateten, Objetivu hosi workshop ne’e sei fo informasaun ba hira ne’ebe mak sei fo responvel programa selesaun eleisaun Parlamentu foinsa’e nian iha teritóriu Timor-Leste. Ohin ne’e partisipante hosi membru Parlamentu foinsa’e, sentru juventude no pontu fokal hosi MJDAK atu esplika ba sira konaba programa sira-ne’e lao oinsa. Alende ne’e mos iha kompaiña eleisaun tekniku detaillu nune’e too ikus ita-bele hetan rezultadu joven feto ida ho mane ida.
“Depois ita sei halo disseminasaun no sosializasaun konaba programa nian iha postu hotu-hotu, sei hahu iha 12 – 16 outubro, nune’e informasaun klaru bele ba iha postu ida-idak depois ita realiza iha sentru juventude. Depois sei loke rejistrasaun ba joven sira ne’ebe idade 12 anus too 17 anus, joven sira-ne’e tenki hela duni iha nia postu mak bele aplika iha formulariu no anexa ho dokumentu.” Nia informa.
Nia dehan, formulariu sira-ne’e bele asesu iha pajina APFTL nian bele mos hetan iha postu administrativu ida-idak nian, aplikante sira-ne’e aplika hotu hafoin halo avaliasaun ba dokumentus sira-ne’e depois se mak liu selesaun mak foin bele kontinua ba iha kampaiña eleisaun hafoin determina joven se mak sai membru parlamentu foinsa’e iha ida-idak nia postu, ikusliu sei iha tomada de pose, programa ida-ne’e nia fim mak too iha tomada de pose. Tinan ohin mak sei kontinua ba programa kapasitasaun iha lideransa.
Nia dehan, rezolusaun iha governu hateten fo espasu ba joven feto no mane iha ida-idak nia postu depois mak mai aprende konserteza idade tenki 12 anus too 17 anus nune’e apartidariu para espasu por espasu hodi aprende ba lideransa nian. Espesifiku mos ba joven defisiénsia sira iha Timor-Leste maibe ne’e responsavel hosi ekipa asosiasaun defisiénsia Timor-Leste (ADTL) mak hapar diak liu hos sira.
“Iha loron 12 too 16 outubro 2026 ne’e disseminasaun no sosializasaun ba programa Parlamentu foinsa’e nian, entaun hosi postu ne’e bainhira halo ona sosializasaun ona automatikamente rejistrasaun loke hahu hosi 12 too 06 novembru hafoin ekipa halo avaliasaun, depois iha 10 novembru sei fo sai rezultadu se mak sei ba iha etapa kampaiña eleisaun, depois iha 17 novembru mak foin akontese kampaiña eleisaun iha postu hotu.” Nia dehan.
“Ekipa postu ne’e kompozisaun hosi membru APFTL, pontu fokal MJDAK nian, sentru juventude, hosi organizasaun iha instituisaun tolu ne’e mak servisu hamutuk hodi organiza ba selesaun eleisaun Parlamentu foinsa’e nia iha postu ida-idak. APFTL hetan fundus hosi Ministériu Juventude Desportu Arte no Kultura (MJDAK), ho montante US$ 140.070 dólar.” Nia dehan.
Jornalista Umbelina dos Reis
