DILI, 6 de Outubro de 2026 (I-Klik.info)-Advogadu ba Juiz nain haat ne’ebé Konsellu Superior Majistratura Judisial (KSMJ) kontesta desizaun ne’ebé transfere juiz sira husi tribunál Dili ba tribunál Baucau, Suai no Oecusse, tanba ne’e kolokasaun juiz sira tenke tuir lei espeitu ba inamobibilidade, audiénsia prévia, fundamentasaun no regra movimentu judisiál, nune’e hafoin Tribunál Rekursu (TR) notifika advogadu sira retira reklamasaun no interpoin rekursu kontensiozu ba Tribunal Rekursu.
Nune’e juiz nain 4 ne’ebé Konsellu Superior Majistratura Judisial foti desizaun hodi transfere husi Tribunál Judisial Primeira Instansia Dili ba tribunál Baucau Suai no Oecusse maka juiz Antonio José Fonseca Monteiro, Ana Paula Fonseca, José Goncalves no Francisca Marques.
Advogadu Olivio Barros no Advogada Maria Agnes Bere ne’ebé reprezenta legalmente juíz na’in-haat husi Tribunal Distrital Díli kontesta desizaun Konsellu Superior Magistratura Judisiál (KSMJ) kona-ba transferénsia juíz na’in-haat no Deliberasaun Konkursu Supremu Tribunal Justisa, nune’e husi sira nia objetivu iha prosesu ne’e rua maka atu reprezenta juíz na’in-haat ne’ebé hato’o reklamasaun no rekursu kontensiozu hasoru desizaun KSMJ kona-ba sira nia transferénsia nomos atu kontesta deliberasaun KSMJ ne’ebé reintegra kandidatu ida, Dr. Alexandre Cortereal, ba konkursu vaga juíz iha Tribunal Supremu Justisa.
“kontestasaun ba transferénsia refere ba juíz na’in-haat ne’ebé antes servisu iha Tribunal Distrital Díli no agora sei transfere ba tribunal sira iha Baucau, Oe-Cusse no Suai no Ami husu atu kolokasaun juíz sira ne’e tenki ezerse tuir lei, respeitu ba inamobibilidade, audiénsia prévia, fundamentasaun no regra movimentu judisiál” dehan advogadu Olivio Barros liuhusi konferénsia imprensa iha ne’ebé halo iha JU,S Faról, (06/10).
Advogadu sira hato’o reklamasaun kona-ba despaxu KSMJ submete ona iha 21 Setembru 2026 ne’ebé Juíz sira simu notifikasaun kona-ba reklamasaun iha 29 Setembru, no despaxu kona-ba desizaun KSMJ simu iha 1 Outubru 2026, nune’e depois de simu notifikasaun, advogadu sira retira reklamasaun no interpoin rekursu kontensiozu ba Tribunal Rekursu, ho pedidu urjente atu suspende efeitu husi desizaun KSMJ.
Advogadu Olivio reforsa, tuir dokumentus ne’ebé sira iha, prazu atu KSMJ deside reklamasaun ne’ebé submete antes ne’e remata iha 6 Outubru 2026, husi pedidu sira, advogadu husu revogasaun desizaun no, alternativamente, adiatamente ezekusaun desizaun KSMJ to’o prosesu konkursu ba Tribunal Supremu Justisa no Tribunal Rekursu remata, karik KSMJ mantein desizaun transferénsia, husu atu fó antesedénsia mínimu loron 30 no estabelese períodu tranzisaun, atu fó tempu ba juíz sira organiza no remata prosesu sira ne’ebé sira atende hela.
“Ami mós informa katak gabinete juízes na’in-haat ne’e iha prosesu pendente hamutuk 747, inklui prosesu kriminal hamutuk 592, desizaun KSMJ kona-ba transferénsia la fixa data klaru kona-ba bainhira desizaun ne’e hahú produz efeitu,” Hatete Advogadu ne’e.
Nune’e husi objetivu seluk maka relasiona ho rekursu iha prosesu númeru 0108/2006/TRD/2026, ne’ebé kandidata ida impugna deliberasaun KSMJ iha 4 Setembru 2026. Deliberasaun ne’e deside reintegra Dr. Alexandre Cortereal hanesan jurista de méritu iha konkursu vaga Tribunal Supremu Justisa, nune’e husi sira nia rekursu alega intervensaun liu husi atribuisaun, falta koru bainhira sira deside ne’e la iha atribuisaun ba iha sira nia partense falta koru no falta partisipasaun obrigatoriu iha konkursu ne’ebé prezidente no vise-prezidente konsellu superior magisratura judisial mós kandidatu an hela, nune’e sira mós kestiona atribuisaun prosesu impugnasaun ne’e ba Dr. Yudi Pamunkas, juíz primeira instánsia no, sekretáriu KSMJ ne’ebé asina akta relevante ba prosesu refere.
Tuir nia, autos la hatudu evidénsia kona-ba sorteiu iha prosesu distribuisaun. Sira argumenta katak atribuisaun prosesu ba juíz ida tenki liu hosi mekanizmu sorteiu, iha loron 2 Outubru 2026, advogadu hato’o alegasaun kona-ba falta distribuisaun, impedimentu no poder judisiál, sira mós husu atu halo sorteiu entre juíz Tribunal Rekursu no konfirma interese iha rekursu refere, konsideradu katak deliberasaun ne’e, tuir sira nia pozisaun, seidauk revogadu ka anuladu, nune’e advogadu husu ba KSMJ atu reune no deside reklamasaun ne’ebé kandidata refere hato’o, no husu ba Tribunal Rekursu atu asegura distribuisaun prosesu tuir lei no garante julgamentu independente.
“Ami submete ona partisipasaun disiplinár hasoru Prezidente Tribunal Rekursu no Juíz Administradór Dili, inklui pedidu suspensaun preventiva, desizaun sira ne’e depende ba prosedimentu legal no rekomendasaun husi instrutór,” Nia hakotu
Jornalista: Silvino Freitas
