Díli, 26 Agostu 2026 (Iklik.Info) –Loron Nasionál Feto Timor da-50 sei selebra ho foku ba igualdade no inkluzaun, ho Governu aprova tema ofisiál “Feto Timor-Leste: Hodi Selebra Tinan 50 Igualdade no Inkluzaun” no lema “Ami, Feto Timoroan sira sei nunka rende, ami sei luta nafatin hodi hetan Igualdade no Inkluzaun” ba komemorasaun ne’e.
Iha Komunikadu ofisiál ne’ebé Iklik.Info sita, ohin sorumutu Konsellu Ministrus aprova projetu Rezolusaun Governu kona-ba tema no lema ofisiál ba komemorasaun Aniversáriu Loron Nasionál Feto Timor da-50, hafoin aprezentasaun hosi Sekretária Estadu Igualdade, Elvina de Sousa Carvalho.
“Tema ne’ebé hetan aprovasaun maka “Feto Timor-Leste: Hodi Selebra Tinan 50 Igualdade no Inkluzaun”, ho lema “Ami, Feto Timoroan sira sei nunka rende, ami sei luta nafatin hodi hetan Igualdade no Inkluzaun,” dehan iha Komunikadu ofisiál ne’ebé Iklik.Info asesu, Kuarta 26/08.
Komemorasaun ne’e ho objetivu atu fó onra no rekoñese kontribuisaun istóriku hosi feto timoroan sira, reforsa kompromisu ba igualdade jéneru no inkluzaun sosiál, no promove partisipasaun ativa hosi feto sira iha prosesu dezenvolvimentu nasionál.
Programa komemorativu ne’e mós iha intensaun atu fó omenajen ba jerasaun feto sira ne’ebé, durante tinan 50 ikus, kontribui ona ba luta independénsia, harii pás no dezenvolvimentu Timor-Leste.
Programa ne’e sei hahú ho serimónia abertura iha loron 3 Novembru 2026, iha Munisípiu Bobonaru, hodi fó omenajen ba Eroína Nasionál Maria Tapó. Atividade ne’e sei inklui programa kulturál no desportivu, misa agradesimentu, no diálogu komunitáriu.
Enkuantu iha loron 6 Novembru 2026, sei hala’o serimónia ofisiál nasionál iha Centro de Convenções de Díli. Serimónia ne’e sei inklui semináriu kona-ba knaar feto sira iha harii dame, igualdade no dezenvolvimentu, espozisaun kona-ba kontribuisaun feto sira ba rezisténsia nasionál no konstrusaun Estadu, no atividade kulturál no artístika.
Aleinde atividade prinsipal sira iha Díli no Bobonaru, Governu mós prevee hala’o atividade komemorativa iha munisípiu sira, atu garante katak spiritu komemorasaun Loron Nasionál Feto Timor da-50 bele envolve komunidade sira iha territóriu tomak.
Sekretaria Estadu Igualdade sei sai entidade responsavel ba koordenasaun jerál komemorasaun no estabelesimentu komisaun organizadora. Koordenasaun ne’e sei hala’o iha kolaborasaun ho ministérius kompetentes, autoridades munisípius, organizasaun sosiedade sivíl, parseirus dezenvolvimentu no entidade relevante sira seluk.
Jornalista: David da Costa
