Dili, 24 de Agosto 2026(I-Klik.info)-Ajensia Nasoens Unidas UNICEF ho Australia AID apoiu motor verza 8 ba Ministeriu Solidade Sosiál (MSSI) hodi haforsa ofisiál protesaun labarik, nune’e Ministra Solidaridade Sosial no Inkluzaun (MSSI) husu ba fasilitador sira ne’ebé uza motor refere atu uza ho kuidadu no responsabilidade.
Edward Wilkinson Reprezentante Embaixada Australia iha Timor Leste dehan, tinan ida-ne’e, Austrália sente orgullu tanba avansa ona ita-nia apoiu ba protesaun labarik, ho AUD millaun 1,2 iha finansiamentu foun hodi investe iha sistema nasional ne’ebe forte liu, no apoia Timor-Leste nia lideransa no kapasidade rasik atu proteje labarik sira agora no ba futuru, nune’e apresia Ministra nia lideransa no ninia Ministériu nia serbisu iha progresu reforma importante sira protesaun labarik nian, inklui hametin mekanizmu sira ba kuidadu alternativu no protesaun labarik online, no harii kapasidade forsa traballu servisu sosiát nian, ba benefisiu labarik sira iha nasaun tomak.
“Ami mos rekoñese UNICEF nia papėl esensial no tempu naruk hodi apoia governu no sosiedade sivil hodi koordena no responde perioridade nasional” dehan Edward Wilkinson Reprezentante Embaixada Australia iha Timor Leste, iha MSSI Kaikoli, (24/08).
Edward informa tan, sistema protesaun labarik ne’ebé forte depende ba forsa traballu servisu sosiál neʼebé presta servisu ba komunidade sira loron-loron, no Ofisiál Protesaun Labarik iha liña oin mak sentrál ba esforsu ida-ne’e. Sira nia dezempeña papėl kritiku ida hodi apoia labarik sira no sira-nia familia iha situasaun vulneravel, data barak sai hanesan pontu kontaktu dahuluk ba labarik sira ne’ebé esperiènsia violénsia, abondona, abuzu, ka separasaun familia nian. Ofisiál Protesaun Labarik sira presiza ferramenta, treinamentu, no apoiu ne’ebé sufisiente atu alkansa labarik no familia sira, responde ba risku sira, no liga ema ho servisu sira ne’ebé sira presiza.
“Austrália fiar katak labarik ida-idak merese atu moris livre husi violénsia, abuzu, abandona, no esplorasaun no garante katak labarik sira seguru no bele buras liu maka fundamentál atu harii jerasaun lider sira tuir mai, no Timor-Leste ida ne’ebé saudavel, prósperu, no reziliente” dehan Edward.
Reprezentante UNICEF iha Timor Leste Patrizia DiGiovanni dehan, apoiu refere reforsa ona ofisiál protesaun labarik sira-nia abilidade atu atinji labarik no família sira ne’ebé presiza apoiu, liuliu iha komunidade sira ne’ebé dook, nune’e ofisiál sira sei hakbesik labarik sira lalais liu, hala’o vizita follow-up ho efisiénsia liu, no hametin servisu jestaun kazu, liuliu iha komunidade remota sira.
“Ohin loron, ita la entrega de’it ita-nia vizaun maibé ami hametin Protesaun Ofisial Labarik sira-nia abilidade atu alkansa labarik no família sira ne’ebé presiza apoiu, liuliu iha komunidade sira ne’ebé dook ofisial sira sei alkansa labarik sira lalais liu, hala’o vizita akompanamentu ho efisiente liu, no hametin servisu jestaun kazu, partikularmente iha komunidade sira ne’ebé dook” dehan Reprezentante UNICEF iha Timor Leste Patrizia DiGiovanni.
Nia informa tan, apoiu ida-ne’e responde diretamente ba nesesidade katak Ofisial Protesaun Labarik sira kontinua haburas ona ho UNICEF durante tinan hirak-ne’e no rona ona pedidu sira no kompriende dezafiu sira ne’ebé hasoru hodi hasoru labarik no família sira iha nasaun laran tomak, tanba ne’e ho haksolok tebes parseria ho Governu Australia liuhusi DFAT, konsege responde ba nesesidade importante ida-ne’e, nune’e UNICEF enkoraja MSSI atu kontinua investe iha mobilidade no efikásia forsa servisu sosiál liuhosi sosa apoiu ne’e ba Ofisial Protesaun Labarik iha munisípiu hotu-hotu no garante katak rekursu operasionál adekuadu, inklui kombustivel no manutensaun, disponivel, nune’e bele maximiza impaktu totál husi investimentu ne’e no garante katak la iha labarik ida husik hela iha kotuk tanba servisu labele to’o ba sira.
“Ohin ita entrega motór sira-nee, ha’u enkoraja ita hotu atu haree sira la’ós de’it hanesan rikusoin, maibé hanesan instrumentu ba asaun no impaktu ne’ebé hala’o tenke ajuda asegura katak labarik ida iha risku hetan identifikasaun lalais liu, família hetan apoiu lalais liu, no komunidade ida sai seguru liu ba labarik sira” informa Reprezentante UNICEF iha Timor Leste Patrizia DiGiovanni.
Entretantu MSSI Veronica das Dores dehan, apoiu husi UNICEF ne’e nuudar kooperasaun ida ne’ebé presiza kontinua ba nasaun ho povu nune’e ema ne’ebé jere apoiu refete tenke toma responsabilidade ho di’ak nune’e atu asegura protesaun sira ne’e ema ne’ebé presiza apoiu sira ne’e inklui grupu vulnerable liuliu violénsia bazeia ba jeneru esplorasaun ba labarik, nune’e atu apoiu protesaun ba labarik sira tanke kontinua apoiu sira ne’ebé hahu ona hodi kontinua di’ak no hadi’a ladi’ak hodi atinji ka alkansa objetivu sira.
“Timor Leste nasaun kiik iha família boot rua nia klaran Indonesia no Australia tanba ne’e loke liman nafatin atu simu apoiu sira ne’ebé ho professionalizmu ho responsabilidade maturidade no sira ne’ebé uza material tenke sente katak nee ba ita nia ema ne’ebé presiza, keta haluha ita boot sira atu uza motor ne’e mai husi parseiru naran katak di’ak ka at naran uza labele hanoin ida ne’e” dehan MSSI Veronica das Dores iha MSSI Kaikoli, (24/08).
Nia dehan tan, hanesan fasilidade ne’ebé importante tebes nunee motorizada ne’e tenke uza ho kuidadu uza ho responsabilidade no maturidade, motorizada sira ne’e hanesan instrumentu ida ne’ebé hodi hatutuan ita nia liman ho ain atu halo servisu besik liu tan ba komunidade ne’ebé presiza no komunidade sira ne’ebé iha liu area sira remota, nune’e nia kontinua apela ba fasilitador sira ne’ebé atu uza motor refere atu uza ho responsabilidade no uza hanesan sira nia rasik no kuidadu motor.
Jornalista: Silvino Freitas
