Dili, 17 Agosto 2026 (I-Klik.info)-Joven ida naran Silvano Gomes hetan tiru husi membru PNTL ida iha Suku Irabin de Baixo Posto Administrativo Uatucarbau, Munisípio Viqueque, haktou ona is iha Ospitál Nasionál Guido Valadares (HNGV) iha oras tuku 9 OTL (Oras Timor Leste), família matebian aseita ona ho mediku sira atu halo autopsia ba matebian nia mate isin hodi hatene motivu husi akontesimentu, nune’e mos família ejiji atu bele prosesa oknum refere tuir lei.
Família matebian Elizario da Silva dehan, kazu hamate matebian ne’e SG ne’e tenke prosesu tuir lei ne’ebé vigor atu bele hatene motivu husi kazu refere, tanba ne’e polísia husu ona família atu bele halo prosesu autopsia nune’e nia hanesan família autoriza atu bele hetan evidensia ruma husi akontesimentu refere.
“Ami família nia ejiji mak tenke tau lei ne’e tuir nia koridor sala ne’e sala loos nee loos, okmun ne’e buat ketak ida instituisaun ne’e buat ketak ida tanba ne’e oknum ne’e tenke prosesu nia bazeia ba lei ne’ebé iha, ami família nia hakarak mak tenke prosesu tuir lei” tenik família matebian iha HNGV, (17/08).
Nia informa tan, hafoin tiru iha Uatucarbau Vikeke transfere mai ospitál referal Vikeke no tanba ho kondisaun ne’ebé grave aviaun husi Dili tula matebian mai iha Dili iha tuku 3 lokraik hodi halo tratamentu iha HNGV, nune’e mate isin família asegura ona iha mortuariu HNGV nune’e hein desizaun husi prokurador atu bele halo autopsia.
“Depende hau rona husi doutor ne’ebé halo operasaun ne’e nia dehan ba hau ne’e nia teen boot foer tuir ne’e kuak 3 ida kiik ne’e kuak 4, ne’e ema doutor operador sira mak koalia mais hau mos la haree” informa família matebian.
Nia konklui, matebian SG forma ona família maibé divorsiadu ho oan nain rua, nune’e prosesu remata sei lori mate isin ba halo serimonia funeral iha munisípiu Vikeke Postu Adminitrativu Uatucarbau.
Insidente akontese iha loron 15 fulan agosto tinan 2026, wainhira polisia tranzitu halo servisu hodi kontrola movimentu transporte iha terenu maibe mosu dezentendementu tanba vitima uza motorizada komete infrasaun ka la uza kapasete.
Jornalista: Silvino Freitas
