Díli, 12 Agostu 2026 (Iklik.info)– Nunu Governu Konstitusional liu husi reuniaun Konsellu Ministru kuarta ne’e, autoriza Ministra Finansas, Santina José Rodrigues F. Viegas Cardoso, atu negosia ho Banku Mundiál kona-ba kontratasaun empréstimu US$30 millaun, liuhusi Asosiasaun Internasionál Dezenvolvimentu (IDA), atu finánsia Projetu Abastesimentu Bee iha Kapitál Munisipál Baukau, ne’ebé sei benefisia besik ema 37.000 to’o tinan 2031.
Tuir proposta husi Vise Ministra Finansas, Regina de Jesus, Konsellu Ministru delibera hodi autoriza Ministra Finansas, Santina José Rodrigues F. Viegas Cardoso, atu negosia ho Banku Mundiál ba kontratasaun empréstimu ida, liuhusi Asosiasaun Internasionál Dezenvolvimentu (IDA – akrónimu iha lian Inglés), ne’ebé destina ba finansiamentu Projetu Abastesimentu Bee iha Kapitál Munisipál Baukau (Baucau Municipal Capital Water Supply).
Projetu ne’e, integra iha faze daruak inisiativa rejionál Seguransa no Reziliénsia Ídriku Banku Mundiál nian, ho objetivu atu hasa’e asesu ba servisu abastesimentu bee ne’ebé jere ho seguru iha área selesionada sira iha Baukau, ne’ebé envolve konstrusaun no operasaun sistema sentralizadu ida ne’ebé reziliente ba mudansa klimátika, ho kapasidade atu benefisia besik ema 37.000 to’o tinan 2031.
“Ho finansiamentu ne’ebé prevee ho millaun US$ 30, projetu ne’e inklui reabilitasaun no espansaun ba fonte no sistema bombajen ne’ebé iha, konstrusaun kaptasaun foun, estasaun bombajen, konduta, instalasaun tratamentu no armazenamentu, inklui mós instalasaun ba ligasaun doméstika besik 7.000 ho mikrometria,” dehan iha komunikadu ne’ebe Iklik.info sita.
Inklui mós medida reforsu kapasidade institusionál no operasionál Bee Timor-Leste (BTL), liuhusi asisténsia téknika, dezenvolvimentu kapasidade no apoiu ba jestaun no manutensaun infraestrutura.
Finansiamentu ne’e sei fó ho kondisaun altamente konsesionál, ho períodu karénsia tinan 10 no maturidade tinan 40, inklui mós opsaun adiamentu pagamentu iha situasaun emerjénsia nasionál relasiona ho eventu klimátiku.
Implementasaun ne’e sei lidera husi Ministériu Obra Públika, liuhusi Unidade Jestaun Projetu, no Timor-Leste (BTL) maka sei responsabiliza ba operasaun no manutensaun infraestrutura hafoin ninia konluzaun.
Jornalista: David da Costa
