Díli, 11 Agostu 2026 (Iklik.info)– Nunu Governu Konstitusional, liuhosi Ministériu Justisa no Sekretaria Estadu Igualdade hahú diskusaun kona-ba alterasaun Lei Nu. 7/2010, kona-ba Kontra Violénsia Doméstika, ho objetivu atu hametin protesaun ba vítima, garante asesu ba justisa no responsabiliza autór sira ne’ebé komete violénsia doméstika iha Timor-Leste
Ministériu Justisa, Sérgio de Jesus Fernandes da Costa Hornai, hateten, violénsia doméstika la’ós de’it asuntu privadu ka problema iha nivel família, maibé sai hanesan problema sosial ne’ebé presiza resposta integradu no efetivu hosi Estadu, instituisaun públika no parte relevante sira hotu.
“Altersaun idane’e, konsidera realidade no nesesidade vítima sira, no garante katak autór sira ne’ebé komete violénsia bele responsabiliza tuir lei. Protesaun ba vítima, asesu ba justisa, prevensaun no responsabilizasaun tenke sai elementu prinsipál iha resposta Estadu,” dehan MJ Sérgio Hornai, iha komunikadu ne’ebe Iklik.info asesu iha pagina ofisial Facebook Ministeru Justisa, Tersa 11/08.
Ministériu Justisa mós enfatiza nesesidade atu hametin kapasidade profisionál, mekanizmu implementasaun no koordenasaun entre instituisaun sira, hodi garante katak dispozisaun legal sira la’ós de’it iha lei, maibé bele implementa ho efetividade iha prátika.
Governu konsidera katak kombate violénsia doméstika presiza abordagem integradu ne’ebé envolve Ministériu Justisa, tribunál sira, Ministériu Públiku, Defensoria Públika, Polísia, servisu saúde, servisu sosial, autoridade lokál, komunidade no sosiedade sivíl.
“Koordenasaun entre instituisaun sira ne’e importante atu garante resposta ne’ebé lalais, koerente no sensível ba nesesidade vítima, inklui asesu ba protesaun, apoiu, servisu essensiál no justisa,” nia haktuir.
Ministériu Justisa reafirma kompromisu atu kontinua halo advokasia, análize no koordenasaun ho instituisaun relevante sira, hodi hametin kuadru legal no mekanizmu institusionál iha prevensaun no kombate violénsia doméstika.
Entertantu inisiativa ida ne’e iha objetivu atu garante katak Lei Kontra Violénsia Doméstika sai instrumentu legal ne’ebé efetivu atu proteje vítima, prevene violénsia, responsabiliza autór sira no garante asesu ba justisa, hodi kontribui ba sosiedade Timor-Leste ne’ebé seguru, justu no respeita dignidade no direitu ema hotu.
Jornalista: David da Costa
