Díli, 11 Agostu 2026 (Iklik.info)– Servisu Migrasaun asegura sidadaun estranjeiru feto na’in 5 iha área Dili Oeste, depois de ekipa operasaun detekta katak sira uza vistu turista ne’ebé mate ona hodi hala’o atividade komersial iha fatin karaoke sira iha Kapital Dili.
Iha komunikadu ne’ebe Iklik.info sita katak, Servisu Migrasaun hala’o operasaun rutina iha área Hudi Laran, Dili, hodi kontrola no fiskaliza atividade sidadaun estranjeiru sira. Operasaun ne’e konsege asegura sidadaun estranjeiru feto na’in 5 ne’ebé deskobre uza vistu turista hodi hala’o atividade komersial.
“Bazeia ba planu operasional, ekipa Makikit hamutuk ho ekipa operasaun Servisu Migrasaun halo fiskalizasaun no inspesaun iha otelaria no fatin karaoke sira iha Kapital Dili. Iha operasaun ne’e, ekipa hetan sidadaun estranjeiru feto na’in 5 ho naran inisial LRA, ISA, PO, DH no ARP, ne’ebé suspeita uza vistu turista hodi buka servisu no hetan lukru,” dehan iha komunikadu ne’ebe Iklik.info asesu husi pagina ofisial Servisu Relasoen Publika, Tersa 11/08.
Iha komunikadu ne’e haktuir, iha verifikasaun dokumentu, ekipa Servisu Migrasaun haree pasaporte no halo kontrolu ba estatutu vistu sidadaun estranjeiru sira. Liuhusi Sistema Jestaun Fronteira, detekta katak vistu sidadaun hirak ne’e mate ona. Tanba ne’e, ekipa halo operasaun buka tuir no konsege hetan sira iha área Dili Oeste.
“Iha prosesu identifikasaun, investigador Servisu Migrasaun nia notifika katak maioria sidadaun estranjeiru hirak ne’e uza vistu turista hodi buka servisu no hetan lukru. Prátika ne’e konsidera hanesan violasaun ba Lei Migrasaun no Azilu, liuliu Artigu 143,” hateten iha komunikadu ne’e.
Tuir prosesu legal, sidadaun ne’ebé komete violasaun bele hetan sansaun ho multa. Maibé, ba sira ne’ebé rekuza atu kumpre sansaun ka prosedimentu legal, Servisu Migrasaun sei submete lista naran ba Ministériu Públiku atu prosesa tuir lei ne’ebé vigora.
Jornalista: David da Costa
