Díli, 8 Agostu 2026 (Iklik.info)–Autoridade Timor-Leste hodi kalan mais ou menus 22:00 Otl, liuhusi operasaun konjunta entre Polísia Nasionál Timor-Leste (PNTL), FALINTIL–Forsa Defeza Timor-Leste (F-FDTL) no Servisu Migrasaun (SM), konsege sobu tan atividade rede Scam Call Centre iha área Metiaut, Postu Administrativu Cristo Rei, Munisípiu Díli, no detein sidadaun estranjeiru hamutuk nain-15, kompostu husi sidadaun Xina nain-12 no Filipina nain-3, ne’ebé agora dadaun sei iha prosesu investigasaun tuir lei vigora.
Iha komunikadu Imprensa ne’ebe Iklik.info sita husi Pagina Ofisial PNTL katak, Ekipa Konjunta Autoridade Timor-Leste, husi Diresaun Servisu Investigasaun Kriminal (DSIK), Diresaun Servisu Informasaun Polísia (DSIP) iha Polísia Nasionál Timor-Leste (PNTL), hamutuk ho Servisu Informasaun N2 Komponente Naval iha FALINTIL–Forsa Defeza Timor-Leste (F-FDTL) no Servisu Migrasaun (SM), konsege sobu tan atividade rede Scam Call Centre no detein sidadaun estranjeiru hamutuk nain-15 durante operasaun ne’ebé hala’o iha área Metiaut, Postu Administrativu Cristo Rei, Munisípiu Díli.
“Operasaun ne’e hala’o iha kalan dia 6 Agostu 2026, tuku 22:00, konsege hala’o detensaun ba sidadaun estranjeiru hamutuk nain-15, kompostu husi sidadaun Xina nain-12 no sidadaun Filipina nain-3, ne’ebé agora dadaun iha hela prosesu investigasaun tuir lei vigora,” dehan iha komunikadu imprensa ne’ebe Iklik.info asesu iha Pagina Ofisial Facebook PNTL, Sexa 7/08.
Operasaun ida ne’e hanesan rezultadu hosi kooperasaun no koordinasaun metin entre PNTL, F-FDTL no Servisu Migrasaun hodi kombate kriminalidade organizadu transnasionál no atividade ilegal sira ne’ebé bele ameasa seguransa no estabilidade nasional. Suspeitu hirak ne’e mos detekta katak, sira nian visa expire ona liu fulan tolu.
Nune’e mos PNTL reafirma nia kompromisu atu kontinua hametin servisu investigasaun no kooperasaun interinstitusionál hodi prevene no kombate krime organizadu, proteje interese nasional no garante seguransa ba komunidade no Estadu Repúblika Demokrátika Timor-Leste.
Reportajen: David da Costa
