DILI, 15 de Outubro de 2026 (I-KLIK.INFO)-Centro Nasionál Chega! (CNC) halo parseiria ho Universidade Nasionál Timor Lorosa’e (UNTL) hodi apoia kursu departmentu istória ne’ebé dadaun ne’e estabelese ona iha Fakuldade Filozofia Ciensia Umana, nunee bele dezenvolve kurrikulu no metodolojia pedagojia, iha área sira hanesan edukasaun ba dame, istória, direitus umanus no justisa tranzasionál, rekursus pertinente sira hanesan Arkivu, Biblioteka, Sítiu Istoriku no Muzeu, kolaborasaun no partisipasaun iha peskiza konjunta, formasaun tematika sira, konferensia, palestra akadémika, jornada sientífika, semináriu, simpoziu no enkontru akadémiku sira seluk.
Reitor Universidade Nasionál Timor Lorosa’e (UNTL), Joviano da Costa, dehan Sentru Chega iha arkivu istóriku barak ne’ebé bele sai fonte importante ba dezenvolvimentu estudu istória, liuliu atu halo peskiza kona-ba problema no eventu istóriku sira ne’ebé akontese iha Timor-Leste, nune’e Sentru Chega iha potensiál atu kontribui ba dezenvolvimentu kursu Istória iha UNTL, liuhusi asesu ba arkivu no dokumentu istóriku sira ne’ebé bele apoia prosesu aprendizajen no peskiza akadémika ba estudante sira.
“Tanba ne’e, Sentru Chega hakarak halo kooperasaun no kolaborasaun ho Fakuldade Filosofia, Siénsia no Umana (FFSU) iha UNTL, atu hametin estudu no peskiza kona-ba istória Timor-Leste” dehan Reitor UNTL Joviano da Costa iha salaun INFORDEPE Balide, (15/10).
Nia dehan tan kooperasaun ne’e konsidera importante atu fó oportunidade ba dosente no estudante sira hodi halo estudu kle’an liután kona-ba istória nasaun nian, liuhusi utilizasaun arkivu istóriku no dokumentasaun relevante sira, kolaborasaun ne’e, hein katak Sentru Chega no UNTL bele hametin kontribuisaun iha área edukasaun, peskiza no preservasaun istória Timor-Leste nian ba jerasaun ohin no futuru.
Entretantu dokumentus ofisialmente ne’e asina husi Reitór Universidade Nacional Timor Lorosa’e (UNTL), Prof. Dr. Joviano Antonio da Costa, M. Eng. no Diretór Ezekutivu Centro Nacional Chega!I.P, Hugo Maria Fernandes, ne’ebé hala’o iha Salaun Ian Martin, INFORDEPE Balide-Dili.
Objetivu husi asina Nota Entendementu ne’e mak, atu hametin kooperasaun entre instituisaun rua (Centro Chega!I.P ho UNTL), ba konseitu no implementasaun programa, asaun no atividade hodi apoiu estabelesimentu departamentu (kursu) istória iha Fakuldade Filozofia no Siénsias Umanas, Universidade Nacional Timor Lorosa’e. Atu koopera malu iha programa, planu asaun no atividade sira ne’ebé sei estabelese hamutuk hodi apoiu ba dezenvolvimentu institusional liu-liu Departamentu Istória UNTL.
Objetivu seluk mak atu apoiu departementu (kursu) Istória iha Fakuldade Filozofia no Siénsias Umanas-UNTL. Integra Modulu Chega! Kona-ba istória, direitus umanus, justisa tranzisional no edukasaun dame iha prosesu aprendisajen tuir natureza fakuldade ida-idak nian iha UNTL.
Jornalista: Silvino Freitas
