Díli, 14 Out Outubru 2026 (Iklik.Info) — Diresaun Nasionál Meteorolojia no Jeofízika (DNMG) Timor-Leste alerta katak ahi-suar husi papua osidentál sei tama liuhusi munisípiu Lautém, Baukau no Viqueque iha madrugada ka dader Sexta-Feira, 16 outubru 2026, ho posibilidade atu avansa ba área rai klaran no hamenus kualidade ár iha territóriu nasionál.
Iha komunikadu ofisiál ne’ebé Iklik News sita husi página Facebook Diresaun Nasionál Meteorolojia no Jeofízika (DNMG) Timor-Leste, katak, DNMG alerta ba públiku kona-ba ahi-suar ka fumasa foun ne’ebé mai husi papua osidentál, ne’ebé previstu atu to’o iha Timor-Leste iha madrugada ka dader loron sexta-feira, 16 outubru 2026.
Tuir informasaun husi DNMG, ahi-suar ne’e sei tama liuhusi Munisípiu Lautém, Baukau no Viqueque, no iha posibilidade atu avansa ba área rai klaran. situasaun ne’e bele halo kualidade ár sai aat liután iha territóriu nasionál.
DNMG mós analiza katak poluisaun ár sei aumenta liután iha sexta-feira, lorokraik to’o inísiu kalan. kondisaun ne’e sei halo kualidade ár sai aat liu kompara ho loron hirak antes iha territóriu Timor-Leste tomak.
Tuir previzaun DNMG nian, kondisaun poluisaun ár ne’e sei kontinua to’o sábado, 17 outubru 2026, durante loron tomak. enkuantu ne’e, visibilidade iha posibilidade atu hadi’a fali iha domingo, lorokraik to’o inísiu kalan.
Nune’e atu hamenus risku ba saúde, DNMG rekomenda ba públiku atu evita atividade fízika iha ar livre, liuliu durante períodu ne’ebé ahi-suar barak. Husu públiku mós atu uza máskara filtrante adekuadu, hanesan, ie, N95, no taka odamatan no janela bainhira ahi-suar aumenta.
DNMG mós enfatiza katak ema vulnerável sira presiza hetan atensaun espesiál, liuliu labarik, katuas no ferik, inan isin-rua, no ema ne’ebé sofre moras respiratóriu ka kardiovaskulár.
Aleinde ne’e, públiku ne’ebé sente sintoma hanesan difikuldade atu dada i’is ka irritasaun iha matan, rekomenda atu buka asisténsia médika lalais.
DNMG mós informa katak sei kontinua monitoriza situasaun liuhusi dadus satélite no rede estasaun observasaun kualidade ár, no sei fó atualizasaun ba públiku bainhira iha mudansa signifikativa ruma.
Jornalista David da Costa
