Díli, 14 outubru 2026 (Iklik.info) — governu japãun entrega karreta bombeiru lima ba Timor-Leste ho apoiu finanseiru hamutuk US$333,987, liuhosi eskema asisténsia finanseira ba projetu komunitária ba seguransa umana (GGP), atu hametin kapasidade Autoridade Protesaun Sivíl (APC) nian iha kombate inséndiu no resposta ba situasaun emerjénsia. Primeiru Ministru (PM) kay Rala Xanana Gusmão hato’o agradesimentu ba governu no povu japãun tanba sira nia solidariedade no amizade ne’ebé kontinua hahú hosi tinan 1999 to’o ohin loron.
Embaixadór Yamamoto hateten, dezde 1999, Japaun implementa ona projetu dezenvolvimentu oioin iha Timor-Leste, inklui iha área saúde, edukasaun, prevensaun inséndiu no seitór seluk ne’ebé iha relasaun direta ho moris loroloron komunidade nian.
“Ami nia eskema asisténsia, ne’ebé hanaran GGP ka Projetu Komunitária ba Seguransa Umana, fornese apoiu finanseiru ba projetu ki’ik sira ne’ebé fó benefísiu direta ba komunidade. To’o agora, ami implementa ona projetu 148, inklui konstrusaun edifísiu eskola, postu saúde no fornese veíkulu emerjénsia sira iha nasaun tomak,” dehan Embaixadór Japáun iha Timor-Leste Yamamoto, iha Palásiu Governu, Tersa 13/10.
Tuir Embaixadór yamamoto, projetu 148 ne’e implementa ona iha munisípiu 12 no Rejiaun Administrativa Espesiál Oe-Cusse Ambeno (RAEOA). Projetu hirak ne’e fó prioridade ba hadi’a infraestrutura komunitária, inklui konstrusaun no reabilitasaun eskola, postu saúde no fornese ekipamentu no veíkulu emerjénsia, hodi responde ba nesesidade bázika komunidade nian.
Ba projetu fornesimentu karreta bombeiru lima ne’e, Governu Japáun disponibiliza apoiu finanseiru hamutuk $333,987 liuhosi eskema GGP. Hosi karreta lima ne’e, haat sei koloka iha Dili no ida iha Munisípiu Lautém.
Embaixadór Yamamoto mós hato’o apresiasaun ba Governu Timor-Leste no autoridade relevante sira, liuliu APC, tanba kooperasaun no esforsu ne’ebé sira hatudu atu asegura realizasaun projetu ne’e.
“Ha’u hakarak hato’o ha’u nia agradesimentu sinseru bá Governu Timor-Leste no autoridade relevante sira hotu ba sira nia kooperasaun no apoiu kontinuu. Liuliu, ha’u hato’o agradesimentu boot ba Autoridade Protesaun Sivíl ba kooperasaun besik no esforsu dedikadu hodi halo projetu ida ne’e sai realidade. La ho kompromisu no kooperasaun hosi ita nia parseiru timoroan sira, serimónia entrega ida ne’e sei la bele realiza”, Embaixadór yamamoto hateten.
To’o agora, Japaun fornese ona karreta bombeiru hamutuk neen ba Timor-Leste. Aleinde ne’e, Japaun sei fasilita formasaun loron lima ba ajente bombeiru sira kona-ba operasaun no utilizasaun karreta bombeiru hirak ne’e.
“Ha’u hein katak ekipamentu no formasaun ne’e sei kontribui atu hametin kapasidade Timor-Leste nian iha kombate inséndiu no resposta ba emerjénsia, no ajuda proteje vida no propriedade povu nian”, Embaixadór Yamamoto hateten.
Husu mós ba autoridade kompetente sira atu asegura manutensaun regulár ba karreta hirak ne’e, nune’e ekipamentu sira bele nafatin iha kondisaun di’ak no presta servisu ba povu Timor-Leste durante tinan barak iha futuru.
Amizade entre Japaun ho Timor-Leste ne’ebé bazeia ba respeitu malu no kooperasaun, sei kontinua sai fundasaun importante ba parseria entre nasaun rua ne’e.
Diplomata ne’e mós espera katak apoiu ne’e bele sai símbolu solidariedade duradoura no fó kontribuisaun signifikativa bá seguransa no moris-di’ak povu timoroan nian.
Iha fatin hanesan, Primeiru Ministru (PM) Kay Rala Xanana Gusmão, lori Governu no povu Timor-Leste nia naran, hato’o agradesimentu ba Governu no povu Japaun tanba sira nia solidariedade no amizade ne’ebé kontinua hahú hosi tinan 1999 to’o ohin loron.
Primeiru Ministru Xanana subliña, Japaun nu’udár parseiru dezenvolvimentu no belun ne’ebé apoia Timor-Leste iha área oioin, no entrega karreta bombeiru lima ne’e sai hanesan evidénsia ida tan kona-ba kompromisu no solidariedade entre nasaun rua.
“Apoiu ida ne’e prova ida tan kona-ba domin ne’ebé Governu no povu Japáun iha ba Timor-Leste no nia povu”, PM Xanana agradese.
Entertantu Karreta bombeiru lima ne’e entrega direita husi Embaixadór Japáun iha Timor-Leste, Yamamoto Yasushi, no simu direta hosi Primeiru Ministru (PM), Kay Rala Xanana Gusmão, hamutuk ho Sekretáriu Estadu Protesaun Sivíl, Domingos Mariano Reis.
Jornalista: David da Costa
