11 Outubro 2026 (Iklik.info) – Liu husi komunikadu ne’ebé IKLIK.INFO asesu iha loron 11 Outubru husi pájina ofisiál Eis Prezidente Republika Lu-Olo nian Saudozu eis Prezidente da Republika Francisco Guterres Lu Olo simu Premiu Eselensia Lusofona iha Casino Estoril Portugal, nune’e atribuisaun premiu ne’ebé organiza husi Asosiasaun Internasional das Comunidade de Lingua Portuguesa, maski serimónia ne’e marka ona ba loron 10 fulan Outubru tinan 2026, maibé eis Prezidente da Republika Francisco Guterres Lu Olo hakotu nia peregrinasaun iha mundu iha loron 21 iha fulan juñu tinan 2026 iha Ospitál Malaysia, nune’e premiu refere simu direita husi nia espoza Cidália Lopes Nobre Mouzinho Guterres ho saudozu eis Prezidente da Republika Francisco Guterres Lu Olo nia oan.
“Lú-Olo simu ho haksolok boot notísia kona-ba atribuisaun PRÉMIU EXCELÊNCIA LUSÓFONA 2026 ba nia. Preparasaun hotu-hotu mós hala’o ona atu nia bele marka prezensa iha Casino do Estoril, iha loron 10 fulan Outubru, hodi simu diretamente prémio prestíjiu ne’e, Maibé, destinu determina katak momentu ne’e labele akontese tuir planu. Serimónia entrega prémio ne’e tenke hala’o nu’udar homenajen pósuma, tanba Lú-Olo la iha ona iha mundu ne’e. Nia feen, Cidália Lopes Nobre Mouzinho Guterres, ne’ebé agora sai faluk, mak sei simu prémio ne’e iha nia naran” haktuir komunikadu ne’ebé IKLIK.INFO asesu iha loron 11 fulan Outubru.
Atribuisaun premiu ne’e haktuir Lu-Olo nia partisipasaun luta ba indepedénsia nasionál no haktuir mos Lu-Olo nia partisipasaun iha prosesu harii estadu RDTL.
Nune’e, Francisco Guterres Lú-Olo moris iha Ossú, munisípiu Viqueque, iha loron 7 fulan Setembru tinan 1954. Nia kaben ho Cidália Lopes Nobre Mouzinho Guterres, no husi kazamentu ne’e sira hetan oan na’in haat, mak hanesan Francisco Cidalino Guterres (Olo Kai), Eldino Nobre Guterres, Felezito Samora Guterres no Dália Guterres. Nia simu edukasaun eskolár iha nivel primáriu iha Kolesiu Santa Teresinha. Ba edukasaun sekundária, nia kontinua estudu iha Díli entre tinan 1969 no 1973. Ikus mai, nia kompleta estudu iha área direitu.
Hafoin harii Frente Revolusionária de Timor-Leste Independente (FRETILIN), Lú-Olo hatudu ona kompromisu katak dalan ba Timor-Leste mak independénsia. Hafoin Indonézia invade Timor-Leste, nia uza naran funu Lú-Olo no ho korajen tama iha luta armada, ho objetivu atu liberta Timor-Leste husi okupasaun Indonézia. Ne’e tempu ida ne’ebé difísil no nakonu ho perigu, to’o Timor-Leste realiza referendu iha loron 30 fulan Agostu tinan 1999. Iha tinan 2000, Lú-Olo fila fali ba moris sivíl.
Ho Lú-Olo nu’udar Prezidente FRETILIN, partidu ne’e manán eleisaun iha loron 30 fulan Agostu tinan 2001. Iha nia lideransa mós, Konstituisaun Repúblika Demokrátika Timor-Leste (RDTL) hetan aprovasaun, ne’ebé to’o ohin loron sei vigora nafatin. Iha oras 00:00, loron 20 fulan Maiu tinan 2002, iha kualidade nu’udar Prezidente Parlamentu Nasionál, Lú-Olo halo Deklarasaun Restaurasaun Independénsia RDTL no fó pose ba Xanana Gusmão nu’udar Prezidente Repúblika.
Lú-Olo hetan eleisaun nu’udar Prezidente Repúblika iha loron 20 fulan Marsu tinan 2017. Nia hetan mós kondekorasaun Colar da Ordem de Timor-Leste no Grande-Colar da Ordem do Infante D. Henrique, husi Portugal.
Jornalista: Silvino Freitas
