Díli, 06 Outubru 2026 (Iklik.Info) — Iha Media Briefing ho Jornalista sira husi media Nasionál, La’o Hamutuk husu média sira atu sai investigativu liután iha kobertura asuntu públiku, liuliu bainhira trata kona-ba polítika fiskál, Orsamentu Jerál Estadu, diversifikasaun ekonomia no projetu mineiru, ho bazeia ba dadus no evidénsia ne’ebé kredível.
Peskizadora La’o Hamutuk, Marta da Silva, hateten, media briefing importante tebes atu fahe informasaun ne’ebé detalhadu ba jornalista sira, liuliu kona-ba polítika fiskál, Orsamentu Jerál Estadu (OJE), diversifikasaun ekonomia no projetu mineiru sira ne’ebé atualmente hala’o iha Timor-Leste.
Marta hateten, durante ne’e, La’o Hamutuk observa katak informasaun ne’ebé média sira foti dala barak fó énfaze liu ba autór sira ka opiniaun husi ema boot sira, maibé dala ruma la akompaña ho dadus ne’ebé kredível atu suporta informasaun ne’e.
“Tanba ne’e mak iha media briefing ne’e ami bele fahe informasaun detalhu liga ba polítika fiskál no Orsamentu Jerál, diversifikasaun ekonomia no mós projetu mineiru ne’ebé agora dadaun la’o iha ita nia rai,” dehan Peskizadora La’o Hamutuk, Marta da Silva ba Jornalista sira iha Salaun Fokupers, Farol, Dili, Tersa 06/10.
Peskizadora Marta esplika, jornalista sira presiza sai jornalista investigativu bainhira halo kobertura ba asuntu ida. Jornalista tenke halo investigasaun to’o hotu no buka evidénsia no dadus ne’ebé relevante, atu bele halo pergunta bazeia ba evidénsia, observasaun no rezultadu peskiza iha terenu.
Marta mós subliña katak antes de debate kona-ba orsamentu Jeral Estadu tinan 2027, jornalista sira presiza iha ona kompriensaun bazika kona-ba orsamentu, inklui orsamentu ba Parlamentu no informasaun relevante kona-ba polítika no programa Governu.
“Molok orsamentu ne’e debate, imi mós bele iha ona báziku kona-ba orsamentu. Nune’e, bainhira imi entrevista membru Governu no Parlamentu, informasaun bázika sira imi iha ona,” Marta hateten.
Peskizadora Marta hateten mós iha futuru, La’o Hamutuk sei ko’alia ho Associação Jornalista Timor-Leste (AJTL) atu haree possibilidade hodi organiza sesaun informasaun ne’ebé kle’an liután ho jornalista sira.
Peskizadora Marta mós propoin atu, se iha tempu to’o oras rua, diskusaun bele fahe tuir sub-topiku, hanesan saúde, edukasaun, diversifikasaun ekonomia no asuntu sira seluk, atu jornalista sira bele kompriende di’ak liután kona-ba kondisaun real iha Timor-Leste.
“Se ita hakarak halo kle’an liu tan, ba futuru ita iha oras rua de’it la iha problema, maibé tenke iha sub-topiku. Ezemplu, ita hakarak topiku saida, ita ko’alia kle’an tiha. Saúde ne’e saida-saida, depois edukasaun mós nune’e, diversifikasaun ekonomia mós hotu. Ita tenke hatene ita-nia kondisaun real ne’e mak oinsá,” Marta Konklui.
Sekretáriu Jerál Asosiasaun Jornalista Timor Lorosa’e (AJTL), Joaquim de Fátima Coutinho, hateten katak atividade média briefing ne’ebé AJTL hamutuk ho sosiedade sivíl La’o Hamutuk hodi fó ba Jornalista sira, ida ne’e nu’udar espasu ida atu halo diskusaun kona-ba Orsamentu Jerál do Estadu (OJE) 2027, ne’ebé Governu sei aprezenta iha Parlamentu Nasionál.
Joaquim de Fátima hateten katak papél media no sosiedade sivíl importante tebes nu’udar mekanizmu kontrolu sosiál ba prosesu dezenvolvimentu iha Timor-Leste, liuliu iha matéria kona-ba OJE.
“Papél media no sosiedade sivíl importante tebes hanesan kontrolu sosiál ba ita nia dezenvolvimentu iha Timor-Leste, liuliu kona-ba Orsamentu Jerál do Estadu,” dehan, Sekretáriu Jerál AJTL Joaquim.
Sekretáriu Jerál AJTL Joaquim, hateten, liuhusi enkontru ho La’o Hamutuk ne’e, AJTL espera atu fahe koñesimentu no diskute hamutuk kona-ba importánsia sosiedade sivíl no media bele halo kontrolu sosiál ba dezenvolvimentu nasionál, liuliu iha prosesu preparasaun, aprovasaun no ezekusaun OJE.
Sekretáriu Jerál AJTL haktuir katak, OJE 2027 agora Governu prepara ona no hein atu aprezenta ba Parlamentu Nasionál. Tanba ne’e, media no sosiedade sivíl presiza kompriende di’ak kona-ba kontéudu no alokasaun orsamentu, atu bele hala’o kontrolu liuhusi informasaun no advokasia.
“Bainhira orsamentu lori ona ba Parlamentu Nasionál no depois iha tinan oin sei hala’o ezekusaun, hanesan media no sosiedade sivíl ita tenke kontrola liuhusi informasaun sira no advokasia, hodi nune’e ita bele kontribui ba ita nia rain, liu-liu ba dezenvolvimentu nasionál Timor-Leste,” nia hateten.
Nia mos subliña katak enkontru ne’e la’ós de’it atu fahe informasaun kona-ba OJE, maibé atu hametin kooperasaun entre media no sosiedade sivíl, hodi bele kontinua kontribui liu husi informasaun ne’ebé di’ak ba públiku.
“Ha’u hein katak ho ita nia sorumutuk ida ne’e, ba oin ita bele hala’o ita nia servisu ho di’ak liután no bele kontribui ba dezenvolvimentu nasionál liuhusi informasaun,” dehan Joaquim de Fátima.
Jornalista: David da Costa
