24 Setembru 2026 (Iklik.info) – Hamnasa la ho limite ( smiles Beyond Borders), nudar motto husi Miss Global Timor-Leste, Dra.Celia Bosco, ne’ebe mak sei prezenta Timor-Leste iha eventu internationl, ho naran konesidu Miss Global.
Celia hatudu nia dilegente no intelektualidade, bainhira partisipa iha performe, hato’o nia mehi no esperansa, hodi reprezenta Timor-Leste iha tinan ida ne’e, iha Bankok Thailandia.
Celia Bosco, nudar dentista, empreendedora, modelu, dosente, treinadora fitness no saúde, no viajante ne’ebé iha paixão atu inspira ema seluk liuhosi advokasia saúde, autokonfiansa, no mudansa pozitivu.
Ba Iklik Investigativu, ho sentiment orgullu nia hateten, reprezenta Timor-Leste iha Miss Global, hakarak promove potensia turizmu no kampiaun ba empoderamentu feto. Ba nia, preparasaun mentál no fíziku maka krusiál molok kompete iha nivel internasionál.
“Ha’u sei hatudu performance di’ak liu, prepara ha’u nia an ba kompetisaun ida-ne’e, tantu mentál no fíziku,” nia hatete.
Nia partisipasaun iha konkursu beleza nian, mai hosi mehi wainhira nia sei kiik, hafoin kompleta nia edukasaun iha dentária, nia husu fali ba nia-an mehi infánsia saida maka nia hakarak atu atinji.
“Dezde ha’u sei ki’ik, ha’u mehi atu kompete iha konkursu beleza nian. Hafoin kompleta ha’u nia estudu dentál, ha’u husu ba ha’u-nia an, what next, mehi saida mak hau sei halo tuir mai, ne’ebé ha’u hakarak atinji?” nia hatete.
Nia rekoñese katak nia nunka hetan oportunidade atu partisipa iha konkursu beleza nian antes. Maibé, loron ida nia aplika espontaneamente. Husi desizaun ne’ebá, nia nunka hein atu to’o iha palku internasionál.
Celia Bosco simu aifunan husi nia mama ho papa. [Foto: Jufertl Photographer]
“Ha’u haree ba feto sira ne’ebé compete, iha konkursu beleza nian hanesan inspirasaun no modelu sira. Mehi hau nian hakarak sai boot hodi sai hanesan sira,” nia hatete.
Promove Timor-Leste iha Miss Global International
Iha eventu refere, nia mós hakarak aprezenta Timor-Leste ba mundu. Tuir nia, Timor-Leste iha destinu turístiku oioin ne’ebé furak, husi tasi-ibun no foho to’o patrimóniu kulturál ne’ebé riku.
“Timor-Leste furak tebes. Ita iha fatin interesante barak hodi vizita, liuliu iha setór turizmu. Ha’u hakarak atu mundu koñese ita-nia nasaun, ita nian tais nebe’e uniku, no konvida sira hodi vizita tasi-ibun sira, foho sira, no goza kultura Timor-Leste nian”, nia hatete.
Hasoru Dezafiu sira iha Eventu Miss Global
Partisipa iha Miss Global hanesan dezafiu boot ida, liu-liu tanba foin primeira vez Timor-Leste kompete iha konkursu ne’e. Ba nia, ida-ne’e mós hanesan nia esperiénsia dahuluk hodi kompete iha konkursu beleza internasionál ida.
“Ne’e hanesan ba dala uluk maka Timor-Leste hetan reprezentasaun iha eventu ida hanesan ne’e, no hanesan mós ha’u nia konkursu internasionál dahuluk. Hau sei hatudu ba nasaun sira seluk, reprezenta Timor-Leste ho orgulu”, dehan Celia ho sentiment orgullu.
Nia rekoñese katak dezafiu no krítika sira hosi sosiedade maka parte ida hosi prosesu. Tanba ne’e, nia haka’as-an atu simu krítika konstrutivu no uza ida-ne’e hanesan esperiénsia aprendizajen ida.
Miss Global Timor-Leste, Dra. Celio Bosco. [Foto: Miss Global Timor-Leste]
Aleinde kompete, nia hala’o hela projetu advokasia ida ho naran “Smile Beyond Borders.” Advokasia ida ne’e foka liu ba loke oportunidade ba jerasaun foinsa’e Timor-Leste nian, liu-liu feto no labarik feto sira, atu ho aten brani buka tuir sira nia mehi.
Nia hakarak labarik sira ne’ebé mehi atu kompete iha konkursu beleza nian, atu iha espasu no oportunidade atu halo sai realidade.
“Hanesan labarik-feto, joven ida, ha’u mós iha mehi hodi kompete iha konkursu sira beleza nian. Tanba ne’e, ha’u hakarak loke oportunidade sira ba labarik sira, liuliu labarik-feto sira, ne’ebé fahe mehi hanesan, hodi nune’e sira iha plataforma ida, hodi alkansa sira nia mehi”, nia esplika.
Nia mós hakarak sai lian ba feto sira, liuliu sira ne’ebé hela iha área rurál ne’ebé seidauk haree ka rona iha nivel internasionál.
“Ha’u hakarak sai hanesan lian ida ba feto sira, liuliu sira ne’ebé maka iha área rurál sira, atu nune’e sira ne’ebé maka durante ne’e invizível no la rona bele hetan rekoñesimentu internasionalmente”, nia hatete.
Nu’udar dentista, nia mós planu atu liga nia advokasia ba kestaun sira saúde oral nian. Liuhusi Miss Global, nia hein atu lori mensajen sira kona-ba empoderamentu feto nian, edukasaun, no importánsia saúde nian ba públiku ne’ebé luan liu.
Se mak Celia Bosco Miss Global Timor-Leste Primeiru
Dra. Celia Bosco, Miss Globál Timor-Leste primeiru, ne’ebé hetan seleksaun direta husi Miss Globál International hodi reprezenta Timor-Leste iha nível internasionál.
Nia dentista, empreendedora, modelu, dosente, treinadora fitness no saúde, no viajante ne’ebé iha paixão atu inspira ema seluk liuhosi advokasia saúde, autokonfiansa, no mudansa pozitivu
Ho orgullu lori Timor-Leste nia naran, Celia lori mós heransa família nian husi Municípiu Lautem, no kontinua valoriza diversidade kulturál no koneksaun globál. Nia jornada hatudu katak beleza no intelijénsia bele la’o hamutuk.
Liuhosi nia estudu no servisu iha área saúde, servisu komunitáriu, no advokasia konabá empoderamentu feto, Celia mós defende iha edukasaun kona-bá saúde, prevensaun moras sira, no autokonfiansa.
Ho nune’e, ho fiar tomak liuhosi plataforma Miss Globál, nia hakarak fahe kultura no turizmu Timor-Leste nian, no inspira feto foin-sa’e sira, no kria impaktu pozitivu bá komunidade
Ho elegánsia, objetivu no orgulho reprezenta Timor-Leste. Dra. Celia Bosco prontu atu lori istória no kultura Timor-Leste bá mundu.
Iha konferensia imprensa ne’ebe organiza husi Miss Global Timor-Leste ho ekipa, Milena Pires reprezentante feto Timor-Leste, hateten kompetisaun ida ne’e laos hare deit kriteriu fiziku feto nian, maibe hare liu ba tanbasa feto nian lian importante, oinsa feto iha korajen atu hamrik No. deende saida mak nia fiar, oinsa feto iha vontade hodi uza oportunidade, hodi serbi familia, komunidade no Timor-Leste.
“Plataforma Miss Global ida ne’e importante, atu bele sai mós plataforma ida ba feto nia lideransa rasik, ita hotu hatene katak Timor-Leste nasaun ida foin hari’i ho potensial tomak, mais ita hakarak hari’i ka konstrui pais ida ne’ebé diak no inkluzivu”, dehan Milena.
Milena haktuir feto halo tiha ona kontribuisaun barak ba Timor-Leste, maibe perguntas ba ema hotu atu refleta, karik feto konsege duni partisipa ohin loron iha desizaun hotu, ne’ebe kontribui atu muda nasaun ne’e ho diak liuk a lae?
Reprezentante Feto Timor-Leste, Milena Pires. [Foto: Zevonia]
Iha fatin hanesan Gill Paulino dos Santos Oliveira, Diretor Arte no Kultura hateten, Governu kontinua apoia jovem sira, hodi promove Timor-Leste liuhusi kultura uniku ne’ebe mak iha,
Jovem sira mak sei hamorin Timor-Leste nia kultura ho paizajen furak sira iha global, promove kultura orizen Timor nian atu mundu bele konese Timor, “Celia Bosco sei reprezenta Timor-Leste iha eventu internasional, haforte ita nian metal, espiritu no vontade hodi kompete ho nasaun boot sira seluk”,
Istoria Miss Global International
Miss Global mak eventu partisipa husi nasaun oioin, ne’ebé harii iha tinan 2013, ho objetivu atu fó kbiit ba feto sira, no simu partisipante sira ne’ebé ho idade 18 to’o 35, inklui mós feto ne’ebé iha ona oan (single mothers).
Miss Global harii husi Van M. Pham no nian fundasaun iha California, Estadu Unidus.
Objetivu mak fo lian no espasu ba feto, hodi hatudu sira nian kapasidade intelektual, iha assume diversidade kultura no halo mudansa pozitivu ba mundu.
Tinan ne’e, Timor-Leste halo istoria foun, hodi partisipa iha eventu ida ne’e, ne’ebe sei reprezenta husi Dra. Celia Bosco, Timor-Leste marka istoria foun iha tinan 24 nia laran.
Reportajen: Zevonia Vieira
