Nova Iorke, 22 Setembru 2026 (Iklik.Info)— Laureada Nóbel ba Pás, Malala Yousafzai, husu Prezidente Repúblika (PR) José Ramos-Horta atu kontinua promove no halo advokasia ba protesaun feto no labarik feto sira ne’ebé vulnerável, liuliu sira ne’ebé moris iha situasaun funu no krize umanitária.
Iha komunikadu ofisiál ne’ebé Iklik News sita katak, iha Segunda-feira 21 Setembru 2026, Prezidente Repúblika, Jose Ramos-Horta, simu audénsia husi Laureada Nóbel ba Pás, Malala Yousafzai, iha Embaixada Timor-Leste ba Nasoens Unidas (ONU), iha Nova Iorke.
Enkontru entre Nobel ba Pás na’in rua ne’e fó oportunidade ba sira atu ko’alia kona-ba direitu feto no direitu labarik feto sira, liuliu asesu ba edukasaun no protesaun ba sira ne’ebé moris iha situasaun vulnerável.
“Iha enkontru ne’e, Malala Yousafzai husu Xefe Estadu atu kontinua promove, liuliu liuhusi nia diskursu ofisiál iha Asembleia Jerál ONU 2026, advokasia kona-ba protesaun ba feto no labarik feto sira ne’ebé vulnerável, espesialmente sira ne’ebé moris iha situasaun funu no krize umanitária,”hateten iha komunikadu ofisiál ne’ebé Iklik News sita husi Palásiu Prezidensiál Bairu-Pite, Tersa 22/09.
Prezidente Repúblika, Ramos-Horta, hatudu nia kompromisu no responde pozitivu ba pedidu ne’e. Nia afirma katak sei kontinua uza fórum internasionál sira atu promove protesaun ba feto no labarik feto sira ne’ebé kontinua moris iha situasaun vulnerável.
Prezidente Ramos-Horta mós enfatiza importánsia husi esforsu atu kombate malnutrisaun no asegura moris saudável ba labarik sira, inklui labarik feto sira.
Prezidente Repúblika mós hato’o nia apresiasaun ba Malala Yousafzai, Laureada Nóbel ba Pás iha 2014, tanba nia korajen no dedikasaun iha defende direitu labarik feto sira atu asesu ba edukasaun iha Paquistão.
Prezidente Ramos-Horta reafirma katak Timor-Leste sei kontinua fó apoiu ba atividade advokasia Malala Yousafzai no nia organizasaun, ho objetivu atu promove no defende direitu feto no labarik feto sira, inklui direitu fundamental ba edukasaun, protesaun no oportunidade hanesan.
