Dili, 17 de Setembru 2026 (I-Klik.info): Liuhusi rezultadu sondajen kandidatu eleisaun prezidensial 2027 ne’ebe halo husi Matadalan Survey and Research Institute (M-SRI) hatudu iha posibilidade boot Francisco Kalbuadi Lay mak elejibilidade sai Prezidenti da Republika ba periodo 2027-2031, survey nee halo ba eleitor hamutuk 575 husi total 859,614 eleitor.
Prezidente MSRI, Jose Guterres dehan, dezde husi tinan 2022 too dadaun eleisaun prezidensial ne’e seida’uk iha survey ba sondajen sira nune’e maibé iha tinan nunee razaun husi sondajen refere maka liuliu ba korida eleisaun prezidensial nian atu sukat kandidatu sira nia popularidade no elejibilidade nunee popularidade atu sukat eleitor sira konese kandidatu sira too iha ne’ebe hodi sukat nia persentajen no iha elejibilidade atu bele hatene eleitor sira nia hakarak atu vota ba figura oinsa.
“Wainhira nain hira hatene ona nain hira nia forsa em termus elejibilidade no popularidade atu kandidatu ida idak bele prepara diak liu tan hodi trasa ita boot sira estratejia hodi difine no koloka nain hira nia rekursu laos de’it hein kampana maka nain hira servisu” dehan Prezidente MSRI Jose Guterres iha ambitu lansamentu survey iha Hotel Timor, (17/9).
Prezidente MSRI Jose Guterres dehan tan, husi relatorio survey refere atu tulun no promove figura sira ne’ebe iha interese atu kandidatu an ba Prezidenti Repúblika iha publiku, nunee husi alvu publiku institutu soe ba publiku hodi avalia liuhusi sondajen publiku atu tetu no taes hodi eleitor sira bele marka sira nia pozisaun hodi prefere hili figura ida ne’ebe hodi bele ukun nasaun iha periodo tinan lima nia laran.
“Iha eleisaun prezidensial iha buat tolu sira tenke konese kada kandidatu ida idak konese mak sira gosta nee mak sira foin hil, tanba ne’e konese figura nee importante” dehan Prezidente MSRI Jose Guterres.
Jose esplika tan, iha razaun importante 3 ne’ebe halo publiku hodi hili kandidatu sira, primeiru tanba razaun sosiolojiku ka premioridial dalaruma husi suku munisipiu hanesan, lian hanesan ka partidu ida segundu razaun maka psikologiku kandidatu sira simpatia besik povu no hadomi povu no terseiru mak sira bolu rasional tanba figura neebe iha pasadu husik eransa ruma ka obra infraestrutura ruma neebe bele impresiona eleitor sira, nunee survey komprova ida nee kada dekada ba dekada iha Europa Amerika Indonesia nomos rezultadu iha Timor-Leste.
Entretantu survey refere halo ba populasaun amostra 575 husi baze dadus 859,613 eleitores hodi hili figura nasional ne’ebe potensial ba kandidatu prezidente da republika periodo 2027-2031 nain 21, nunee tuir amostra sira nia konesimentu ba figura sira, sira preferensia iha eleisaun no posibilidade boot ba figura sira ne’e hodi sai Prezidente da Repúblika.
Nune’e husi nivel konesimentu populasaun nian hatudu figura Dr. José Ramos-Horta ho pursentu 86, iha nivel preferensia populasaun nian figura Francisco Kalbuadi Lay ho pursentu 8,66 no figura posibilidade boot ba sai Prezidenti da Republika maka Francisco Kalbuadi Lay ho pursentu 15,08, nunee nivel sira ne’e hautudu komunidade sira hili figura ne’ebe iha kapasidade esperensia ho pursentu 67 no figura ne’ebe husi partido politiku pursentu 24 no figura indepedente pursentu 9.
Nune’e figura ne’ebe MSRI foti hodi halo sondajen publiku ba relatoriu survey ho tema ‘Dalan Demokratika Hakat ba Palasiu Prezidensiál Aitarak Laran’ maka Dr José Ramos-Horta, Lere Anan Timur, Antonio da Conceição, Deonisio Babo, Joao Mariano Saldanha, Rui Araújo, Francisco Kalbuadi Lay, Francisco Maukura, Taur Matan Ruak, Armanda Berta, Tomas Cabral, Lourenco de Oliveira, José Reis, Joaquim Fonseca, Gil Oan Soru, Fidelis Magalhaes, Bendito Freitas, Adriano do Nasimento, Aderito Hugo, Milena Pires no Jose Manuel Serano, nune’e husi sondajen refere figura Francisco Kalbuadi Lay iha posibilidade boot sai Prezidenti da Republika ba Periodo 2026-2031.
Jornalista: Silvino Freitas
