Dili, Iklik News – Iha loron 11 Outubru 2026, Embaixadóra Singapura, Teo Lay Cheng, organiza matabisu kreativu ida hafoin exibisaun filme badak rua husi Singapura, Captive Audience no A Feeling of Music Playing, iha Dili International Film Festival (DIFF). Eventu ne’e hamutuk amante filme sira, múziku sira no membru komunidade diplomátika atu selebra sena realizasaun filme independente Singapura nian no esplora forsa istória konta nian atu liga ema sira liu husi kultura oin-oin.
Diriji husi realizadór filme Singapura, Kew Lin, Captive Audience (minutu 14) konta kona-ba saxofonista jazz ida ne’ebé luta atu hetan audiência, maibé ikus mai deskobre ouvinti sira ne’ebé valoriza nia músika iha zoo ida. Bainhira nia músika hahú atrai atensaun, nia tenke hili entre indústria músika ne’ebé uluk rejeita nia no ema sira ne’ebé laran-metin aprecia nia arte. Filme ne’e halo estreia iha Singapore International Film Festival iha tinan 2025.
Filme da-ruak, A Feeling of Music Playing (minutu 28), diriji husi realizadór filme Singapura Ong Kah Jing, esplora esperiénsia abstratu maibé umanu teb-tebes atu halo músika hamutuk. Liu husi sesaun jam ne’ebé la halo ensaiu uluk, ho músiku na’in haat ne’ebé toka instrumentu Ázia oioin, filme ne’e hatudu oinsá ema estranju sira bele hetan pontu komun no lentamente deskobre ritmu ida ne’ebé partilla hamutuk liu husi músika.
Refleta kona-ba exibisaun filme ne’e iha Timor-Leste, Ong dehan: “A Feeling of Music Playing mak ponte ida ne’ebé úniku ba Singapura, maibé fasil ba ema hotu kompriende, no hau espera katak bele liga ema sira liu husi kultura no nasionalidade oin-oin. Hau haksolok atu lori filme ida ne’e mai membru ASEAN foun hanesan Timor-Leste, no hein-metin aprendizajen no deskoberta mútua entre ita hotu.”
Diretora DIFF, Lena Lenzen, simu ho di’ak partisipasaun contínua Embaixada nian iha festival ne’e, ho liafuan hirak tuir mai: “Hafoin susesu filme Singapura Oversteer iha tinan kotuk, ne’ebé manán prémiu Melhor Filme Longa-Metragem, ami kontente tebes atu simu fila-fali Embaixada Singapura mai DIFF ho filme badak espesial rua no realizadór filme ida ne’ebé mai vizita. Agora Timor-Leste sai ona membru ASEAN, filme no kreatividade mak dalan ida ne’ebé di’ak atu hamutuk liutan povu no nasaun rua ne’e.”
Reprezentante Proprietáriu Pacific International Lines (PIL)/Mariana Express Lines (MEL), Stevenson Cheng, ne’ebé apoia sesaun pergunta no resposta ho Ong, dehan: “Dala ida ne’e mak primeira vez PIL/MEL sai ko-patrocinadór ba filme Singapura sira iha DIFF. Ami hetan esperiénsia ida ne’ebé di’ak tebes ho organizadór sira no hein atu apoia eventu hanesan iha futuru.”
Hafoin exibisaun filme, Embaixadóra Teo organiza matabisu kreativu ida atu fó ambiente informál ba participante sira atu hasoru malu no troka hanoin. Estasaun servisu tosta ayata no manteiga, matabisu tradisionál Singapura nian, kompleta ho kafé Timor. Kaya mak doce ida ne’ebé halo husi leit kokus, masin-midak, manu-tolu no pandan-tahan. Normalmente servidu ho manteiga malirin ida ne’ebé tau entre fatia paun tostu rua. Han ne’e popular tebes nu’udar ha-han favoritu no merenda iha Singapura.
“Ámi agradese tebes tanba fatin exibisaun ne’e besik nakonu iha dadeer domingo ida ne,” dehan Embaixadóra Teo. “Embaixada kontente tebes atu aprezenta sena realizasaun filme independente Singapura nian. Maske filme rua ne’e iha estilo ne’ebé diferente, rua hotu reflete aspetu balun husi esperiénsia umana, hanesan aspirasaun, luta, relasaun no buka sentidu no ligasaun ho ema seluk,” nia hatutan.
Filme sira ne’e fó impaktu ba audiência iha maneira oin-oin. Kantora Michelle Soares, bazeia ba nia esperiénsia rasik nu’udar músika ida, dehan katak nia bele identifika-an ho filme rua ne’e. Nia mos gosta prova tosta ayata ho Manteiga ba dahuluk vez no simu ho haksolok oportunidade atu esperiénsia han-mutin tradisionál Singapura ida iha Timor-Leste.
Estudante universitáriu husi Universidade Nasional Timor Lorosa’e, Nicolau Maubere Menezes, mos aprecia matabisu especial ida ne’e. Nia deskreve kombinasaun kaya butter toast ho kafé Timor nu’udar selebrasaun únika ida kona-ba ligasaun entre nasaun rua ne’e.
Liu husi filme no hahán, eventu ne’e sai selebrasaun ida ne’ebé manas no amistozu kona-ba kreatividade, troka kultura no esperiénsia lor-loron sira ne’ebé aproxima ema sira ba malu, no reafirma papel arte nian iha aprofundamentu relasaun amizade entre Singapura no Timor-Leste.
