Dili, 25 de Agostu 2026 (I-Klik.info)-Diretor Ezekutivu Lalenok ba Ema Hotu (LABEH) Christopher Henry Samson dehan, durante dezenvolvimentu lao governu hotu hotu iha nia programa sira kona-ba luta kontra korupsaun, boa governasaun no transparansia akuntabilidade maibe governu hotu nia ukun ne’ebe lao ho programa ne’ebe liuhusi prosesu ne’ebe naruk maibe nia implementasaun monu ema ne’ebe la dun iha integridade nune’e hamosu governasaun ida ne’ebe deskonfia hamonu Korupsaun Koluzaun no Nepotizmu (KKN).
“Iha implementasaun programa laiha problema tanba programa tuir lei, prosesu ne’ebe lao hetan aprovasaun iha konsellu ministru no parlamentu nasional depois promulga husi prezidente da republika” dehan Diretór Ezekutivu LABEH hafoin selebra ezistensia tinan 23 iha LABEH Kampung Baru, (25/08).
Christopher informa tan, maski politika publika governu nian tuir lei maibé iha prosesu implementasaun laos lideransa hotu iha kapasidade atu implementa programa ne’ebe governu ida inisia husi aspirasaun governu nian rasik, maibé tanba inkapasidade la konesimentu no komprensaun ba programa ne’e rasik mak integridade ne’e sai problema ba sira, maibe tanba influensia husi LABEH nian ba ema hotu iha tinan 23 nia laran maka ema hotu bele hamriik hodi ko’alia kona-ba korupsaun.
“Iha tinan 23 susar tebes ema tauk ko’alia kona-ba korupsaun maibé ohin loron ema koalia kona-ba korupsaun ho integridade avontade ko’alia ho kontente ba deskonfia sira ne’ebe mosu ne’e husi advokasia ne’ebe saida mak LABEH hetan iha tinan 23 nia laran” informa Diretor LABEH Christopher Henry Samson.
Ativista ne’e konklui, liuhusi selebrasaun aniversariu ba dala 23 LABEH ejiji ba governu sira dadaun ne’e no governu ne’ebe sei mai atu bele iha akuntabilidade ne’ebe transparente no importante tenke nakloke ba povu hodi espresa saida mak halo ba nia povu husi nee de’it maibe bele hetan konfiansa husi povu husi integridade akuntabilidade no transparansia iha implementasaun governu nia programa ne’ebe aprova iha parlamentu nasional.
Nune’e organizasaun naun governamental Lalenok ba Ema Hotu (LABEH) durante ne’e halo advokasia makaas hodi kontra korupsaun liuhusi media no monitorizasaun, nune’e ohin LABEH selebra nia tinan ba dala 23 hamriik hodi kontra korupsaun iha instituisaun estatal ne’ebe akontese iha Timor-Leste.
Jornalista: Silvino Freitas
