Liuhusi komunikadu ne’ebé IKlik.info asesu iha pajina ofisiál polísia nasionál nian katak, arguidu nain 15 neebe polísia nasional liuhusi Diresaun Servisu Investigasaun Kriminal (DSIK) kaptura iha area Bekaril suku Metiaut Postu Adminitrativu Cristo Rei Munisípiu Dili nune’e Tribunál Judisial Primeira Instansia Dili (TJPID) liuhusi julgamentu deside aplika medida prizaun preventiva ba arguidu sira ne’ebé alegadamente envolve iha atividade rede Scam Call Centre.
“Tribunal aplika Medida prizaun preventiva ne’e hafoin autoridade seguransa, liuhosi DSIK-PNTL, susesu aprezenta arguidu nain-15 ho evidensia ba Tribunal Judisiál Primeira Instánsia Dili hodi hala’o prosesu interrogatóriu dahuluk, iha Domingu, loron 09 Agostu 2026” haktuir komunikadu husi pájina ofisiál polísia nasionál nian ne’ebé IKlik.info asesu, (10/08).
Komunikadu haktuir tan iha prosesu interrogatóriu ne’e, autoridade seguransa aprezenta ba Tribunal prova no evidénsia sira ne’ebé hetan durante prosesu investigasaun kona-ba alegada atividade rede Scam Call Centre iha área Bekaril, Suku Metiaut, bazeia ba konsiderasaun Tribunal haree prova sira ne’ebé aprezenta, Tribunal Judisiál Primeira Instánsia Dili deside aplika medida prizaun preventiva ba arguidu nain-15.
“Hafoin desizaun Tribunal, DSIK-PNTL susesu lori arguidu sira ba Prizaun Bekora hodi kumpri medida koasaun ne’ebé Tribunal determina” haktuir komunikadu.
Komunikadu ne’e informa tan, operasaun no prosesu investigasaun ne’e hatudu kompromisu no seriedade PNTL, liuhosi DSIK, iha kombate atividade kriminál, liu liu atividade ne’ebé bele ameasa seguransa, orden públika no interese komunidade, nune’e PNTL liuhosi DSIK kontinua komprometidu atu halo investigasaun tuir prosedimentu no dispozisaun lei ne’ebé vigora iha Timor-Leste, no sei kontinua foti medida nesesáriu kontra atividade kriminál sira, nunee PNTL mós apela ba komunidade atu kontinua kolabora ho autoridade kompetente liuhosi fó informasaun relevante kona-ba atividade suspeita ne’ebé bele prejudika seguransa no estabilidade iha sosiedade.
Jornalista: Silvino Freitas
