Díli, 29 de Setembru 2026(I-Klik.info) – Organizasaun Arcoiris Timor Leste (ATL), realiza formasaun durante loron ruaba Jornalista no Estudante komunisaun Sosial husi universidade Nasional Timor-Lorosa’e (UNTL), Sira kona-ba Segurasan Digital KA oinsa utiliza media ho seguru no objetivu atu hasa’e koñesimentu no kapasidade Jornalista no Estudante komunisaun Sosial atu utiliza media ho seguru no evita fahe Ita Nia identidade pessoal ka numeru ba ma ne’ebe Ita la koinse, nunee mos oinsa atu respeita kona-ba komunidade LGBTIQ no direitu umanus iha Timor-Leste.
Afy de Jesus, hanesan project officer husi Arcoiris Timor Leste (ATL), hatete katak objetivu prinsipál husi formasaun ne’e mak hasa’e koñesimentu média kona-ba oinsá atu produz notísia inkluziva.
“Dala barak, komunidade LGBTIQ hasoru bullying no diskriminasaun iha sosiedade. Tanba ne’e, formasaun hanesan ne’e importante atu ajuda média komprende situasaun komunidade sira no dissemina informasaun ne’ebé bele kontribui ba sosiedade ida ne’ebé inkluziva ATL, nu’udar organizasaun ne’ebé servisu iha área direitu umanus no defesa komunidade LGBTIQ, halo peskiza kona-ba realidade ne’ebé komunidade LGBTIQ sira hasoru iha sosiedade,” Nia dehan iha Salaun Fokupers Farol (29/09).
Nia dehan tan rezultadu husi peskiza sira ne’e sai baze ba organizasaun atu kontinua halo atividade no formasaun, ho objetivu atu hametin kapasidade komunidade no parseiru sira iha esforsu prevene bullying no diskriminasaun.
“Liuhusi formasaun ida ne’e, ami espera katak partisipante sira bele komprende di’ak liután oinsá atu kontribui ba minimiza diskriminasaun ne’ebé komunidade LGBTIQ sira hasoru formasaun ne’e hetan apoiu husi (OUTRIGHT),Together In Strength: Paths To Protection & Belonging no implementasaun programa ne’e hahú iha fulan Janeiru no sei remata iha fulan Dezembru”, dehan project officer Afy
Arcoiris Timor Leste espera katak atividade sira hanesan ne’e bele kontinua kontribui ba dezenvolvimentu média ne’ebé responsavel no ba konstrusaun sosiedade Timor-Leste ida ne’ebé respeita diversidade, igualdade no direitu umanus.
Iha Fatin hanesan Estudante husi Universidade Nasionál Timor Lorosa’e (UNTL), Departamentu Komunikasaun Sosiál, Jonhanes Estanislau Freitas, hatete katak formasaun kona-ba era dijital no seguransa dijital bele loke tan hanoin estudante sira, liuliu iha área teknolojia dijital ne’ebé kontinua avansa.
Johanes hatete katak durante loron rua formasaun, sira aprende buat barak liuhusi programa Arcoiris Timor-Leste, liuliu kona-ba era dijital, seguransa dijital no oinsá atu uza teknolojia ho di’ak no responsavel.
“Durante loron rua ne’e, ami aprende buat barak kona-ba era dijital no seguransa dijital. Ami aprende mos oinsá atu uza teknolojia ho di’ak no bele fó benefísiu ba ita. Buat ne’ebé ami aprende bele implementa iha ami nia moris loroloron ami tuir formasaun ne’e fó mos ami nia komprensaun kona-ba importánsia proteje privasidade no identidade dijital, liuliu bainhira uza email, TikTok, Facebook no plataforma dijital seluk,” hateten Jonhanes
Nia informa katak utilizadór sira tenke kuidadu ho kode sira nia pesoal la bele fahe ba ema seluk atu nunee ema seluk la bele uza identidade ita hodi bele prejudika ema seluk.
“Durante formasaun, partisipante sira mos fahe esperiénsia liuhusi servisu grupu. Kada grupu fahe buat ne’ebé sira komprende ba malu, ho objetivu atu hametin koñesimentu no komprensaun kona-ba seguransa dijital no informasaun falsu ne’ebé fahe liuhusi liña. Nia hatete katak ema tenke kuidadu tanba informasaun falsu bele uza dokumentu ka dadus pesoál ema nian hodi bosok ka estraga ema seluk,” dehan estudante Jonhanes.
Nia espera katak koñesimentu ne’ebé hetan liuhusi formasaun ne’e bele aplika iha moris loroloron no ajuda estudante sira sai utilizadór ne’ebé responsavel no kuidadu iha era dijital.
Formasaun ne’e partisipa husi Media no estudante sira hamutuk 15 mak partisipante iha formasaun ida nee no foka liuliu ba oinsá média bele produz no dissemina informasaun ne’ebé respeita diversidade no evita diskriminasaun iha sosiedade.
Jornalista: Joanina Casamiro
